വട്ടവട മണ്ണിടിച്ചിൽ ദുരന്തം: ഉച്ചയ്ക്ക് 12.30ന് ആരംഭിച്ച മഴ നീണ്ടത് 4 മണിക്കൂറിലേറെ; നാട്ടുകാരെത്തിയത് മാരിയമ്മയുടെ കരച്ചിൽ കേട്ട്
Screenshot
കേരളം: വട്ടവട മേഖലയിൽ ഇന്നലെ ഉച്ചയ്ക്ക് 12.30ന് ആരംഭിച്ച മഴ വൈകിട്ട് 5 വരെ നീണ്ടുനിന്നു. ഉച്ചതിരിഞ്ഞു 3ന് മഴ ശക്തമായപ്പോഴാണ് അപകടമുണ്ടായത്. വേനൽമഴ ചതിച്ചതിനെത്തുടർന്ന് വട്ടവടയിൽ കഴിഞ്ഞ മേയ് മാസം കൃഷിയിറക്കിയ പച്ചക്കറികൾ പൂർണമായി ഉണങ്ങി നശിച്ചിരുന്നു. കഴിഞ്ഞ രണ്ടാഴ്ചയായി മേഖലയിൽ മഴ ലഭിച്ചു തുടങ്ങിയതോടെയാണ് നാട്ടുകാർ കൃഷിയിടങ്ങൾ ഒരുക്കാനാരംഭിച്ചത്. ഇത്തരത്തിൽ കൃഷിയിടം ഒരുക്കുന്നതിനിടയിൽ മഴ കനത്ത സമയത്താണ് കൃഷിയിടത്തിലായിരുന്ന ബാലകൃഷ്ണനും ഭാര്യ മാരിയമ്മയും അയൽവാസി ചിന്നമ്മാളും ഓടി കൃഷിയിടത്തിലെ ഷെഡിൽ കയറിയിരുന്നത്. കനത്ത മഴ തുടരുന്നതിനിടയിലാണ് മുകൾ ഭാഗത്തുനിന്നു മണ്ണും കല്ലുകളും ഒഴുകിയെത്തി ഷെഡിനു മുകളിൽ പതിച്ചത്. പാതി മണ്ണിനടിയിൽ പുതഞ്ഞുപോയ മാരിയമ്മയുടെ കരച്ചിൽ കേട്ടെത്തിയ നാട്ടുകാരാണ് ഇവരെ പുറത്തെടുത്തത്. വട്ടവടയിലുണ്ടായിരുന്ന ആംബുലൻസിൽ ഇവരെ മൂന്നാറിലെത്തിച്ചു.
About The Author
