എടക്കാട് വീട്ടിൽ വൻ കവർച്ച; വീട്ടുകാർ ഉറങ്ങിക്കിടക്കവേ കിടപ്പുമുറിയിലെ അലമാരയിൽ നിന്നും സ്വർണ്ണവും പണവും മോഷ്ടിച്ചു
എടക്കാട്: വീട്ടുകാർ ഉറങ്ങിക്കിടക്കവേ വീട്ടിനുള്ളിൽ കടന്ന മോഷ്ടാവ് അലമാരയിൽ സൂക്ഷിച്ചിരുന്ന സ്വർണ്ണവും പണവും കവർന്നു. എടക്കാട് നടാൽ സ്വദേശിനി ടി. ഖദീജയുടെ (33) വീട്ടിലാണ് വൻ മോഷണം നടന്നത്.
കിടപ്പുമുറിയിലെ അലമാരയുടെ ലോക്ക് തുറന്ന് വലിപ്പിൽ സൂക്ഷിച്ചിരുന്ന 7,77,330 രൂപ വിലവരുന്ന ആറേമുക്കാൽ പവൻ സ്വർണ്ണവും 40,000 രൂപയുമാണ് നഷ്ടപ്പെട്ടത്. സ്വർണ്ണ മാല, ബ്രേസ്ലെറ്റുകൾ, കമ്മലുകൾ, നെക്ലേസ് എന്നിവയാണ് മോഷ്ടിക്കപ്പെട്ട സ്വർണ്ണാഭരണങ്ങൾ.
മോഷണം ശ്രദ്ധയിൽപ്പെട്ടതിനെ തുടർന്ന് വീട്ടുകാർ എടക്കാട് പോലീസിൽ പരാതി നൽകി. സംഭവത്തിൽ കേസെടുത്ത പോലീസ് പ്രദേശത്തെ സി.സി.ടി.വി ദൃശ്യങ്ങൾ ഉൾപ്പെടെ കേന്ദ്രീകരിച്ച് ഊർജ്ജിതമായ അന്വേഷണം ആരംഭിച്ചിട്ടുണ്ട്.
About The Author
