കണ്ണൂരിൽ സി.പി.എം പ്രവർത്തകരുടെ വൻ പ്രതിഷേധം ഇരമ്പുന്നു -

Spread the love

കണ്ണൂർ: മുൻ മുഖ്യമന്ത്രി പിണറായി വിജയന്റെ വസതിയിൽ എൻഫോഴ്‌സ്‌മെന്റ് ഡയറക്ടറേറ്റ് (ഇ.ഡി) നടത്തുന്ന പരിശോധനയ്‌ക്കെതിരെ കണ്ണൂരിൽ സി.പി.എം പ്രവർത്തകരുടെ വൻ പ്രതിഷേധം ഇരമ്പുന്നു. തങ്ങളുടെ പ്രിയ നേതാവിനെ കേന്ദ്ര ഏജൻസികളെ ഉപയോഗിച്ച് വേട്ടയാടുകയാണെന്ന് ആരോപിച്ച് നിരവധി പ്രവർത്തകരും അനുഭാവികളുമാണ് പിണറായിയിലെ വീടിന് മുന്നിൽ തടിച്ചുകൂടിയിരിക്കുന്നത്. സമീപ പ്രദേശങ്ങളിൽ നിന്നും നൂറുകണക്കിന് പ്രവർത്തകർ പ്രതിഷേധത്തിൽ പങ്കുചേരാൻ ഇപ്പോഴും എത്തിക്കൊണ്ടിരിക്കുകയാണ്.

അക്രമാസക്തമായ മുദ്രാവാക്യങ്ങൾ, കടുത്ത പ്രതിഷേധം:

വർഷങ്ങളായി തുടരുന്ന രാഷ്ട്രീയ വേട്ടയാടലിന്റെ തുടർച്ചയാണ് ഈ നടപടിയെന്നും ഇതിലും വലിയ അടിയന്തരാവസ്ഥ കണ്ടവരാണ് തങ്ങളെന്നും പ്രതിഷേധക്കാർ ആക്രോശിച്ചു. ഇ.ഡി ഉദ്യോഗസ്ഥരെ ‘തെമ്മാടികൾ’ എന്ന് അഭിസംബോധന ചെയ്തുകൊണ്ടും, ധൈര്യമുണ്ടെങ്കിൽ ഇറങ്ങി വരാൻ വെല്ലുവിളിച്ചുകൊണ്ടും കടുത്ത മുദ്രാവാക്യങ്ങളാണ് പ്രതിഷേധക്കാർ മുഴക്കുന്നത്. “തെമ്മാടിത്തം കാണിച്ചാൽ ഞങ്ങൾ അടങ്ങിയിരിക്കില്ല”, “കാല് തല്ലിയൊടിക്കും” തുടങ്ങിയ അക്രമാസക്തമായ രീതിയിലുള്ള മുദ്രാവാക്യങ്ങളും ഇവിടെ ഉയരുന്നുണ്ട്. മാധ്യമങ്ങൾ ഈ വേട്ടയാടലിന് കൂട്ടുനിൽക്കുകയാണെന്നും, ശബ്ദം ഉയർത്തേണ്ട സമയം അതിക്രമിച്ചുവെന്നും പ്രവർത്തകർ പ്രതികരിച്ചു.

മോദിയും സതീശനും തമ്മിൽ ഗൂഢാലോചനയെന്ന് പി. ജയരാജൻ:

റെയ്ഡ് ബി.ജെ.പിയും കോൺഗ്രസും ചേർന്നുള്ള രാഷ്ട്രീയ ഗൂഢാലോചനയാണെന്ന് മുതിർന്ന സി.പി.എം നേതാവ് പി. ജയരാജൻ ആരോപിച്ചു. പ്രധാനമന്ത്രി നരേന്ദ്ര മോദിയും പ്രതിപക്ഷ നേതാവ് വി.ഡി. സതീശനും തമ്മിൽ കഴിഞ്ഞ ദിവസം നടത്തിയ കൂടിക്കാഴ്ചയ്ക്ക് തൊട്ടുപിന്നാലെയാണ് പിണറായി വിജയന്റെയും റിയാസിന്റെയും വീടുകളിൽ പരിശോധന നടന്നതെന്ന് ജയരാജൻ ചൂണ്ടിക്കാട്ടി. ഇ.ഡി എന്നത് യഥാർത്ഥത്തിൽ സംഘപരിവാറിന്റെ ഒരു ‘എക്സ്ട്രാ ഡിപ്പാർട്ട്‌മെന്റ്’ ആയിട്ടാണ് രാജ്യത്ത് പ്രവർത്തിക്കുന്നതെന്നും, കോൺഗ്രസിനെ വിഴുങ്ങിയ ബി.ജെ.പിക്ക് കേരളത്തിൽ ആധിപത്യം ഉറപ്പിക്കണമെങ്കിൽ സി.പി.എമ്മിന്റെ തലയറുക്കണമെന്നും അദ്ദേഹം വ്യക്തമാക്കി. ഈ റെയ്ഡുകളെ നിയമപരമായും രാഷ്ട്രീയമായും പാർട്ടി നേരിടുമെന്നും ജയരാജൻ കൂട്ടിച്ചേർത്തു.

കെജ്രിവാൾ മോഡൽ തിരക്കഥയെന്ന് കെ.കെ. രാഗേഷ്:

നരേന്ദ്രമോദി സർക്കാർ കേരളത്തിലെ ഇടതുപക്ഷ പ്രസ്ഥാനത്തെ തകർക്കുന്നതിനു വേണ്ടി വളരെ ആസൂത്രിതമായി നടത്തുന്ന നീക്കത്തിന്റെ ഭാഗമാണിതെന്ന് സി.പി.എം കണ്ണൂർ ജില്ലാ സെക്രട്ടറി കെ.കെ. രാഗേഷ് പറഞ്ഞു. ഡൽഹി മുഖ്യമന്ത്രി അരവിന്ദ് കെജ്രിവാളിനെ കള്ളക്കേസിൽ കുടുക്കി ജയിലിലടച്ചതിന് സമാനമായ രീതിയിലുള്ള കുതന്ത്രമാണ് ഇപ്പോൾ കേരളത്തിൽ നടപ്പിലാക്കുന്നതെന്നും അദ്ദേഹം വിമർശിച്ചു. രാഷ്ട്രീയ എതിരാളികളെ നിശബ്ദരാക്കാൻ ഇ.ഡിയെ ഉപയോഗിക്കുന്ന നരേന്ദ്രമോദിയുടെ ഡിസൈനാണ് ഇതിലൂടെ വെളിവാകുന്നത്. ഇത്തരം രാഷ്ട്രീയ പകപോക്കലുകളെ ജനങ്ങളെ അണിനിരത്തി നേരിടുമെന്നും കെ.കെ. രാഗേഷ് വ്യക്തമാക്കി.