സംഘപരിവാറിന്റെ ‘ഗ്രാൻഡ് ഡിസൈൻ’ തുറന്നുകാട്ടുന്ന പുസ്തകം; പി. ജയരാജന്റെ ‘സനാതനികളുടെ ഹിന്ദുത്വ വഴികൾ’ പ്രകാശനം ചെയ്തു
Screenshot
കണ്ണൂർ: സംഘപരിവാർ കേരളത്തിൽ പിടിമുറുക്കാൻ നടത്തുന്ന ശ്രമങ്ങളെ തുറന്നുകാട്ടുന്ന പി. ജയരാജന്റെ ‘സനാതനികളുടെ ഹിന്ദുത്വ വഴികൾ’ എന്ന പുസ്തകം കണ്ണൂർ എ.കെ.ജി ഹാളിൽ വെച്ച് പ്രകാശനം ചെയ്തു. മുൻ മുഖ്യമന്ത്രിയും സി.പി.എം പോളിറ്റ് ബ്യൂറോ അംഗവുമായ പിണറായി വിജയൻ, ശിവഗിരി ധർമ്മസംഘം ട്രസ്റ്റ് ജനറൽ സെക്രട്ടറി സ്വാമി ശുഭാംഗാനന്ദയ്ക്ക് പുസ്തകം നൽകിയാണ് പ്രകാശനം നിർവ്വഹിച്ചത്.
കേരളത്തെ പിടിച്ചെടുക്കാൻ കഴിഞ്ഞ അമ്പത് വർഷമായി സംഘപരിവാർ നടത്തിക്കൊണ്ടിരിക്കുന്ന ‘ഗ്രാൻഡ് ഡിസൈൻ’ ആണ് പുസ്തകത്തിലുള്ളതെന്ന് പിണറായി വിജയൻ പറഞ്ഞു. ഇത്തരം നീക്കങ്ങൾക്കെതിരെയുള്ള പോരാട്ടങ്ങൾക്ക് ഈ പുസ്തകം വലിയ ഊർജ്ജം നൽകും. ശിവഗിരിയിൽ നടന്ന അക്രമങ്ങൾക്ക് പിന്നിലും ഇതേ ഗൂഢാലോചനയാണെന്ന് കേരളകൗമുദി പത്രാധിപർ എം.എസ് മണി നിരീക്ഷിച്ചിട്ടുണ്ട്. സംഘപരിവാറിനെതിരെ സ്വന്തം ജീവിതം കൊണ്ട് പ്രതിരോധം തീർത്ത വ്യക്തിയാണ് പി. ജയരാജൻ. അദ്ദേഹം ശാരീരികമായ അക്രമങ്ങളെ അതിജീവിച്ചതുകൊണ്ടാണ് ഇത്തരം ഒരു പുസ്തകം നമുക്ക് ലഭിച്ചതെന്നും പിണറായി വിജയൻ കൂട്ടിച്ചേർത്തു.
കെ.ടി കുഞ്ഞിക്കണ്ണൻ പുസ്തക പരിചയം നടത്തി. സി.പി.എം കണ്ണൂർ ജില്ലാ സെക്രട്ടറി കെ.കെ രാഗേഷ് അധ്യക്ഷത വഹിച്ച ചടങ്ങിൽ മുൻ മന്ത്രി രാമചന്ദ്രൻ കടന്നപ്പള്ളി, മുൻ സ്പീക്കർ എ.എൻ ഷംസീർ, പനോളി വത്സൻ, പി.വി ഗോപിനാഥ്, ഡോ. വിനിൽ പോൾ തുടങ്ങിയവർ പങ്കെടുത്തു. കെ.കെ പ്രകാശൻ സ്വാഗതവും പി. ജയരാജൻ മറുപടി പ്രസംഗവും നടത്തി.
About The Author
