പയ്യന്നൂരിൽ പ്രഭാത സവാരിക്കിടെ കാറിടിച്ച് വയോധികന് ദാരുണാന്ത്യം; മരിച്ചത് സി.പി.എം വിമത നേതാവ് വി. കുഞ്ഞിക്കൃഷ്ണന്റെ സഹോദരൻ -

Spread the love

പയ്യന്നൂർ: പയ്യന്നൂർ വെള്ളൂരിൽ പ്രഭാത സവാരിക്കിടെ കാറിടിച്ച് വയോധികന് ദാരുണാന്ത്യം. സി.പി.എം വിമത നേതാവ് വി. കുഞ്ഞിക്കൃഷ്ണന്റെ സഹോദരനും ആദ്യകാല കമ്മ്യൂണിസ്റ്റ് പ്രവർത്തകനും മുൻ സഹകരണ ബാങ്ക് ജീവനക്കാരനുമായ വെള്ളൂർ സ്വദേശി വി. രാമചന്ദ്രൻ (87) ആണ് മരിച്ചത്. ശനിയാഴ്ച രാവിലെ വീടിനടുത്ത് ദേശീയ പാതയുടെ സർവീസ് റോഡിലൂടെ നടക്കാൻ ഇറങ്ങിയപ്പോഴായിരുന്നു അപകടം സംഭവിച്ചത്.

പോരാട്ടങ്ങളുടെയും അധ്വാനത്തിന്റെയും ജീവിതം:

എടച്ചേരി കമ്മാര പൊതുവാളുടെയും വണ്ണാടിൽ ചിരിയകുഞ്ഞിയമ്മയുടെയും മകനായി ഒരു സാധാരണ കർഷക കുടുംബത്തിലാണ് വി. രാമചന്ദ്രന്റെ ജനനം. ചെറുപ്പത്തിൽ തന്നെ കൃഷിപ്പണികളിൽ ഏർപ്പെട്ടിരുന്ന അദ്ദേഹം, വിദ്യാർത്ഥി കാലഘട്ടം മുതൽക്കേ കമ്മ്യൂണിസ്റ്റ് ആശയങ്ങളിൽ ആകൃഷ്ടനായിരുന്നു. അൺട്രെയിൻഡ് അധ്യാപകനായി ജോലി ചെയ്യവെ പാർട്ടി പരിപാടികളിൽ പങ്കെടുത്തതിന് ശിക്ഷാ നടപടികൾ നേരിട്ടിട്ടുണ്ട്. പിന്നീട് പട്ടാളത്തിൽ ചേർന്നുവെങ്കിലും പോലീസ് വെരിഫിക്കേഷൻ സമയത്ത് കമ്മ്യൂണിസ്റ്റ് ആണെന്ന കാരണത്താൽ ജോലിയിൽ നിന്ന് പിരിച്ചുവിടപ്പെട്ടു.

സഹകരണ മേഖലയിലെ നിറസാന്നിധ്യം:

തുടർന്ന് സഹകരണ മേഖലയിലേക്ക് തിരിഞ്ഞ അദ്ദേഹം, പയ്യന്നൂർ റൂറൽ ബാങ്കിലും പിന്നീട് കണ്ണൂർ ജില്ലാ സഹകരണ ബാങ്കിലും (ഇന്നത്തെ കേരള ബാങ്ക്) ജോലി ചെയ്തു. 30 വർഷത്തിലധികം സേവനമനുഷ്ഠിച്ച ശേഷം 1998-ലാണ് അദ്ദേഹം വിരമിച്ചത്. കാറമേൽ പ്രദേശത്ത് രൂപീകൃതമായ ഐക്യനാണയ സംഘത്തെ 1964-ൽ വെള്ളൂരിലേക്ക് കൊണ്ടുവരുന്നതിലും, അത് വെള്ളൂർ സർവ്വീസ് സഹകരണ സംഘമായി വളർന്നപ്പോൾ അതിന്റെ ഹോണററി സെക്രട്ടറിയായും ആദ്യ ഡയറക്ടർ ബോർഡ് അംഗമായും അദ്ദേഹം പ്രവർത്തിച്ചു.

വെള്ളൂർ ജവഹർ വായനശാലയുടെ സെക്രട്ടറിയായും, വെള്ളൂർ ജനതാ ചാരിറ്റബിൾ സൊസൈറ്റിയുടെയും കോഴിവളർത്തൽ സഹകരണ സംഘത്തിൻ്റെയും ആദ്യകാല പ്രൊമോട്ടറായും രാമചന്ദ്രൻ സജീവമായിരുന്നു. സി.പി.എമ്മിന്റെ ആദ്യകാല മെമ്പറായിരുന്ന അദ്ദേഹം ലോക്കൽ-മണ്ഡലം കമ്മിറ്റികളിലും പ്രവർത്തിച്ചിട്ടുണ്ട്. വെള്ളൂരിലെ അടിപ്പാത്ര സമരരംഗത്തും സജീവ സാന്നിധ്യമായിരുന്നു അദ്ദേഹം.

• ഭാര്യ: പി.ടി. ജാനകി.

• മക്കൾ: പി.ടി. ജയചന്ദ്രൻ (ശാസ്ത്രജ്ഞൻ, ബ്രൺസ്വിക്ക് യൂണിവേഴ്സിറ്റി, കാനഡ), ശ്രീലത (റിട്ട. അധ്യാപിക), പി.ടി. സുധീർകുമാർ (അഭിഭാഷകൻ, പയ്യന്നൂർ ബാർ).

• സഹോദരങ്ങൾ: മാധവി, നാരായണൻ, വി. കുഞ്ഞികൃഷ്ണൻ (സി.പി.എം വിമത നേതാവ്).

മൃതദേഹം പോസ്റ്റ്‌‌മോർട്ടത്തിനായി പരിയാരം മെഡിക്കൽ കോളേജ് ആശുപത്രിയിലേക്ക് മാറ്റി. സംഭവത്തിൽ ഇടിച്ച കാർ പോലീസ് കസ്റ്റഡിയിൽ എടുത്തിട്ടുണ്ട്.