ഇന്ത്യയോട് തോറ്റ് തകർന്ന് പാകിസ്ഥാൻ; ലോകകപ്പിൽ നിന്നും പുറത്താകുമോ? നമീബിയക്കെതിരായ മത്സരം നിർണ്ണായകം
കൊളംബോ: ട്വന്റി-20 ലോകകപ്പ് 2026-ൽ ചിരവൈരികളായ ഇന്ത്യയോട് 61 റൺസിന്റെ കനത്ത തോൽവി ഏറ്റുവാങ്ങിയതോടെ പാകിസ്ഥാൻ ടീം പ്രതിസന്ധിയിൽ. ഞായറാഴ്ച കൊളംബോയിലെ ആർ. പ്രേമദാസ സ്റ്റേഡിയത്തിൽ നടന്ന ആവേശപ്പോരാട്ടത്തിൽ ഇന്ത്യയുടെ വിജയം പാകിസ്ഥാനെ പോയിന്റ് പട്ടികയിൽ മൂന്നാം സ്ഥാനത്തേക്ക് തള്ളിയിട്ടു. ഇതോടെ ബുധനാഴ്ച നമീബിയക്കെതിരെ നടക്കുന്ന മത്സരം പാകിസ്ഥാന് ജീവന്മരണ പോരാട്ടമായി മാറി. ഇതിൽ തോറ്റാൽ മുൻ ചാമ്പ്യന്മാർ ടൂർണമെന്റിൽ നിന്ന് പുറത്താകും.
ഇന്ത്യ ഉയർത്തിയ 176 റൺസ് വിജയലക്ഷ്യം പിന്തുടർന്ന പാകിസ്ഥാന് തുടക്കത്തിലേ പിഴച്ചു. ഇഷാൻ കിഷന്റെ തകർപ്പൻ ബാറ്റിംഗിന്റെ (77 റൺസ്) കരുത്തിൽ 7 വിക്കറ്റ് നഷ്ടത്തിൽ 175 റൺസാണ് ഇന്ത്യ അടിച്ചുകൂട്ടിയത്. മറുപടി ബാറ്റിംഗിൽ ഉസ്മാൻ ഖാൻ (44) ഒഴികെ മറ്റാർക്കും ഇന്ത്യൻ ബൗളിംഗ് നിരയെ ചെറുക്കാനായില്ല. റൺ അടിസ്ഥാനത്തിൽ ഇന്ത്യയും പാകിസ്ഥാനും തമ്മിലുള്ള ട്വന്റി-20 ചരിത്രത്തിലെ ഏറ്റവും വലിയ വിജയമാണിത്. ഈ ജയത്തോടെ ഇന്ത്യ സൂപ്പർ എയിറ്റ് യോഗ്യത ഉറപ്പാക്കി.
തന്ത്രം പാളിയെന്ന് സൽമാൻ ആഗ:
പേസ് ബൗളർ ഷഹീൻ ഷാ അഫ്രീദിക്ക് വെറും രണ്ട് ഓവർ മാത്രം നൽകി 18 ഓവറുകളും സ്പിന്നർമാരെക്കൊണ്ട് എറിയിച്ച തന്ത്രം പാളിയെന്ന് പാക് ക്യാപ്റ്റൻ സൽമാൻ ആഗ മത്സരശേഷം സമ്മതിച്ചു. തോൽവിയോടെ പാകിസ്ഥാന്റെ നെറ്റ് റൺറേറ്റ് +0.932-ൽ നിന്നും -0.403 ലേക്ക് കൂപ്പുകുത്തി.
നമീബിയയോട് പാകിസ്ഥാൻ പരാജയപ്പെട്ടാൽ, ഗ്രൂപ്പിൽ രണ്ടാം സ്ഥാനത്തുള്ള അമേരിക്ക (USA) സൂപ്പർ എട്ടിലേക്ക് മുന്നേറും. 2024-ലെ ലോകകപ്പിലും പാകിസ്ഥാനെ പിന്നിലാക്കി അമേരിക്ക യോഗ്യത നേടിയ ചരിത്രം ആവർത്തിക്കുമോ എന്ന ആശങ്കയിലാണ് പാക് ആരാധകർ.
About The Author
