ചരിത്രമെഴുതി സ്വിസ് പട; പെനാൽറ്റി ഷൂട്ടൗട്ടിൽ കൊളംബിയയെ വീഴ്ത്തി സ്വിറ്റ്സർലൻഡ് ക്വാർട്ടറിൽ!
Screenshot
വാൻകൂവർ: 1954-ന് ശേഷം ആദ്യമായി സ്വിറ്റ്സർലൻഡ് ലോകകപ്പിന്റെ ക്വാർട്ടർ ഫൈനലിൽ പ്രവേശിച്ചു. വാൻകൂവറിലെ ബി.സി പ്ലേസ് സ്റ്റേഡിയത്തിൽ നടന്ന ആവേശകരമായ പ്രീക്വാർട്ടർ പോരാട്ടത്തിൽ പെനാൽറ്റി ഷൂട്ടൗട്ടിൽ കൊളംബിയയെ 4-3 എന്ന സ്കോറിന് തോൽപ്പിച്ചാണ് സ്വിസ് പടയുടെ മുന്നേറ്റം. നിശ്ചിത സമയത്തും അധിക സമയത്തും ഇരു ടീമുകൾക്കും ഗോൾ നേടാൻ സാധിച്ചില്ല. ഞായറാഴ്ച മിസൗറിയിൽ നടക്കുന്ന ക്വാർട്ടർ ഫൈനലിൽ നിലവിലെ ചാമ്പ്യന്മാരായ അർജന്റീനയാണ് സ്വിറ്റ്സർലൻഡിന്റെ എതിരാളികൾ.
തുടക്കത്തിൽ തന്നെ മികച്ച ഫോമിലായിരുന്ന യൊഹാൻ മാൻസാംബിക്ക് പരിക്കേറ്റത് സ്വിറ്റ്സർലൻഡിന് തിരിച്ചടിയായി. മറുവശത്ത് ജെയിംസ് റോഡ്രിഗസ് കൊളംബിയക്കായി ഏറ്റവും കൂടുതൽ മത്സരങ്ങൾ കളിക്കുന്ന താരമെന്ന ചരിത്രനേട്ടം സ്വന്തമാക്കി കളത്തിലിറങ്ങി. മത്സരത്തിലുടനീളം ഇരു ടീമുകളും ഇഞ്ചോടിഞ്ച് പോരാട്ടം കാഴ്ചവെച്ചെങ്കിലും ഗോൾകീപ്പർമാരുടെ മികച്ച സേവുകൾ ഗോളുകൾ അകറ്റിനിർത്തി. എക്സ്ട്രാ ടൈമിൽ കൊളംബിയൻ താരം ജോൺ ലുകുമിയുടെ ഹെഡർ ക്രോസ്ബാറിൽ തട്ടി മടങ്ങിയത് മത്സരത്തിലെ നിർണ്ണായക നിമിഷമായി.
പെനാൽറ്റി ഷൂട്ടൗട്ടിൽ സ്വിറ്റ്സർലൻഡ് കൂടുതൽ കൃത്യത പുലർത്തി. ഗോൾകീപ്പർ ഗ്രെഗോർ കോബെൽ നടത്തിയ തകർപ്പൻ സേവുകൾ സ്വിസ് ടീമിന് തുണയായി. സെഡ്രിക് ഇറ്റെനും റൂബൻ വാർഗാസും ലക്ഷ്യം കണ്ടതോടെ സ്വിറ്റ്സർലൻഡ് വിജയം ഉറപ്പിക്കുകയായിരുന്നു.
About The Author
