പണം നൽകാത്തതിന് സ്വന്തം വീടിന് തീയിട്ട് യുവാവ്; കണ്ണൂർ ആയിക്കര സ്വദേശി പിടിയിൽ -

Spread the love

കണ്ണൂർ: ലഹരിക്ക് അടിമയായ യുവാവ് സ്വന്തം വീടിന് തീയിട്ടു. സംഭവത്തിൽ കണ്ണൂർ ആയിക്കര സ്വദേശി അഭിഷേകിനെ പോലീസ് അറസ്റ്റുചെയ്തു. ചൊവ്വാഴ്ച പുലർച്ചെ മൂന്നരയോടെയായിരുന്നു നാടിനെ നടുക്കിയ സംഭവം. വീട്ടിൽനിന്ന് തീയും പുകയും ഉയരുന്നത് കണ്ട് അയൽവാസികളാണ് പോലീസിനെയും അഗ്‌നിരക്ഷാസേനയെയും വിവരമറിയിച്ചത്.

തുടർന്ന് പോലീസും അഗ്‌നിരക്ഷാസേനയും സ്ഥലത്തെത്തി കഠിനപ്രയത്നത്തിനൊടുവിലാണ് തീയണച്ചത്. കട്ടിലും കിടക്കയും വസ്ത്രങ്ങളും ഉൾപ്പെടെ വീട്ടിനുള്ളിലെ ഒട്ടേറെ വസ്തുക്കൾ തീപിടിത്തത്തിൽ പൂർണമായി കത്തിനശിച്ചിട്ടുണ്ട്.

അഭിഷേക് ആവശ്യപ്പെട്ട പണം പിതാവ് നൽകാത്തതിനെ തുടർന്നുണ്ടായ പ്രകോപനമാണ് വീട് കത്തിക്കുന്നതിലേക്ക് നയിച്ചത് എന്നാണ് വിവരം. അഭിഷേകിന്റെ നിരന്തരമായ ശല്യവും ഭീഷണിയും കാരണം മാതാപിതാക്കൾ ഈ വീട്ടിൽനിന്ന് മാറിത്താമസിക്കുകയായിരുന്നു. ഇതിനിടയിലാണ് പുലർച്ചെയോടെ യുവാവ് വീടിന് തീയിട്ടത്.