ചക്കരക്കല്ല് മുഴപ്പാലയിൽ റിട്ട. അധ്യാപികയുടെ വീടിന്റെ ചുമരും വാതിലും കരിയോയിലൊഴിച്ച് വികൃതമാക്കി
Screenshot
ചക്കരക്കല്ല്: ചക്കരക്കല്ല് മുഴപ്പാല നരിക്കോട് റിട്ട. പ്രഥമാധ്യാപികയുടെ വീടിനുനേരെ സാമൂഹ്യവിരുദ്ധരുടെ ആക്രമണം. നരിക്കോട്ട് യു.പി. സ്കൂൾ റിട്ട. പ്രഥമാധ്യാപിക കുന്നിനാത്ത് വീട്ടിൽ പി.കെ. നാരായണി ടീച്ചറുടെ (92) വീടിനുനേരെയാണ് തിങ്കളാഴ്ച പുലർച്ചെ ആക്രമണമുണ്ടായത്.
വീടിന്റെ വരാന്തയിലും വാതിലിലും ചുമരിലുമായി കരിഓയിൽ ഒഴിച്ച് വികൃതമാക്കിയ നിലയിലാണ്. 92 വയസ്സുള്ള ടീച്ചറും അവരുടെ സഹായിയുമാണ് ഈ വീട്ടിൽ താമസിച്ചുവരുന്നത്. വീടിന്റെ മുൻഭാഗത്തെ വാതിലിലും വരാന്തയിലും കരിഓയിൽ ഒഴിച്ചതിന് പുറമേ, കരിഓയിൽ ശേഖരിച്ചുകൊണ്ടുവന്ന കന്നാസും ചെരുപ്പും സംഭവസ്ഥലത്തിന് സമീപത്തുനിന്ന് കണ്ടെത്തിയിട്ടുണ്ട്. സംഭവവുമായി ബന്ധപ്പെട്ട് അധ്യാപിക ചക്കരക്കൽ പൊലീസിൽ പരാതി നൽകിയിട്ടുണ്ട്.
സന്ദർശനവും നാട്ടുകാരുടെ പ്രതികരണവും:
സംഭവസ്ഥലം ഡി.സി.സി. ജനറൽ സെക്രട്ടറി കെ.കെ. ജയരാജൻ, മണ്ഡലം കോൺഗ്രസ് പ്രസിഡന്റ് കെ.സി. അബ്‌ദുൾ റഹിമാൻ, വാർഡ് മെമ്പർ മധു എന്നിവർ സന്ദർശിച്ചു. ഈ പ്രദേശത്ത് ഇതിനുമുമ്പും ചില വീടുകൾക്കുനേരെ സമാനമായ രീതിയിൽ കരിഓയിൽ ഒഴിക്കുന്ന അക്രമങ്ങൾ ഉണ്ടായിട്ടുണ്ടെന്ന് നാട്ടുകാർ പറഞ്ഞു. പരാതിയുടെ അടിസ്ഥാനത്തിൽ പൊലീസ് സ്ഥലത്തെത്തി അന്വേഷണം ആരംഭിച്ചിട്ടുണ്ട്.
About The Author
