തൃശ്ശൂർ മേയറെ പ്രഖ്യാപിച്ചതിന് പിന്നാലെ കോൺഗ്രസിൽ ‘പൊട്ടിത്തെറി’; പണം വാങ്ങി തന്നെ തഴഞ്ഞതെന്ന് ലാലി ജെയിംസ്, ആരോപണം തള്ളി നിജി ജസ്റ്റിൻ

തൃശ്ശൂർ: മേയർ തിരഞ്ഞെടുപ്പ് നടക്കാനിരിക്കെ തൃശ്ശൂർ കോർപ്പറേഷനിൽ കോൺഗ്രസിനുള്ളിൽ നാടകീയ നീക്കങ്ങളും പരസ്യമായ പോരും. ഔദ്യോഗിക സ്ഥാനാർത്ഥിയായി ഡോ. നിജി ജസ്റ്റിനെ പ്രഖ്യാപിച്ചതിന് പിന്നാലെ, പരിഗണനാ പട്ടികയിലുണ്ടായിരുന്ന മുതിർന്ന നേതാവ് ലാലി ജെയിംസ് നേതൃത്വത്തിനെതിരെ ഗുരുതര ആരോപണങ്ങളുമായി രംഗത്തെത്തി.

പണം ചോദിച്ചെന്ന് ലാലി ജെയിംസ്

മേയർ പദവി നൽകുന്നതിനായി പാർട്ടി ഫണ്ട് ആവശ്യപ്പെട്ടെന്നും തന്റെ കൈവശം പണമില്ലാത്തതിനാലാണ് തന്നെ തഴഞ്ഞതെന്നുമാണ് ലാലി ജെയിംസിന്റെ ആരോപണം. “പാർട്ടിക്ക് പ്രവർത്തിക്കാൻ ഫണ്ട് വേണമെന്ന് ഡിസിസി അധ്യക്ഷൻ ജോസഫ് ടാജറ്റ് പറഞ്ഞു. പണമുള്ള മറ്റാരെയോ സ്ഥാനാർത്ഥിയായി തിരഞ്ഞെടുത്തുവെന്ന് സംശയമുണ്ട്. ആദ്യ ഒരു വർഷം പദവി നൽകിയാൽ മതിയെന്ന് പറഞ്ഞിട്ടും നേതൃത്വം തയ്യാറായില്ല,” ലാലി ജെയിംസ് മാധ്യമങ്ങളോട് പറഞ്ഞു. പാർട്ടി വിപ്പ് സ്വീകരിക്കാൻ തയ്യാറാകാത്ത അവർ തിരഞ്ഞെടുപ്പിൽ എന്ത് നിലപാട് സ്വീകരിക്കുമെന്നത് കോൺഗ്രസിനെ ആശങ്കയിലാക്കുന്നുണ്ട്.

ആരോപണങ്ങൾ തള്ളി നിജി ജസ്റ്റിൻ

അതേസമയം, ലാലി ജെയിംസിന്റെ ആരോപണങ്ങൾ അടിസ്ഥാനരഹിതമാണെന്ന് സ്ഥാനാർത്ഥി ഡോ. നിജി ജസ്റ്റിൻ പ്രതികരിച്ചു. താൻ കഴിഞ്ഞ 28 വർഷമായി പാർട്ടിയിൽ സജീവമാണെന്നും സ്ഥാനമാനങ്ങൾ വരികയും പോവുകയും ചെയ്യുമെന്നും അവർ പറഞ്ഞു. വിവാദങ്ങളിൽ പകയ്ക്കില്ലെന്നും മുഴുവൻ കോൺഗ്രസ് അംഗങ്ങളുടെയും വോട്ട് തനിക്ക് ലഭിക്കുമെന്നും നിജി ജസ്റ്റിൻ ആത്മവിശ്വാസം പ്രകടിപ്പിച്ചു.

അനുനയ നീക്കവുമായി നേതൃത്വം

പ്രശ്നം രൂക്ഷമായതോടെ മുതിർന്ന നേതാവ് തേറമ്പിൽ രാമകൃഷ്ണനെ മുൻനിർത്തി ലാലി ജെയിംസിനെ അനുനയിപ്പിക്കാനുള്ള ശ്രമങ്ങൾ കോൺഗ്രസ് ആരംഭിച്ചിട്ടുണ്ട്. ഇന്ന് ഉച്ചയ്ക്ക് നടക്കുന്ന തിരഞ്ഞെടുപ്പിൽ ലാലി ജെയിംസ് വിട്ടുനിൽക്കുകയോ മാറി വോട്ട് ചെയ്യുകയോ ചെയ്താൽ അത് യുഡിഎഫിന് വലിയ തിരിച്ചടിയാകും.

About The Author