തിരുപ്പിറവിയുടെ സ്മരണയിൽ; ശാന്തിയുടെ സന്ദേശമോതി പള്ളികളിൽ ക്രിസ്മസ് തിരുകർമ്മങ്ങൾ
കണ്ണൂർ: ലോകമെങ്ങും രക്ഷകന്റെ തിരുപ്പിറവി ആഘോഷിക്കുമ്പോൾ, ശാന്തിയുടെയും സമാധാനത്തിന്റെയും സന്ദേശവുമായി കണ്ണൂരിലെ വിശ്വാസികളും ക്രിസ്മസ് ആഘോഷത്തിൽ പങ്കുചേർന്നു. ജില്ലയിലെ വിവിധ പള്ളികളിൽ നടന്ന പാതിരാ കുർബാനയിലും മറ്റ് തിരുകർമ്മങ്ങളിലും ആയിരക്കണക്കിന് വിശ്വാസികളാണ് പങ്കെടുത്തത്.
കണ്ണൂർ രൂപതയുടെ ഭദ്രാസന ദൈവാലയമായ ബർണശ്ശേരി ഹോളി ട്രിനിറ്റി കത്തീഡ്രലിൽ നടന്ന ക്രിസ്മസ് പാതിരാ കുർബാനയ്ക്ക് കണ്ണൂർ രൂപത ബിഷപ്പ് ഡോ. അലക്സ് വടക്കുംതല മുഖ്യകാർമികത്വം വഹിച്ചു. ക്രിസ്മസ് പ്രത്യാശയുടെയും സമാധാനത്തിന്റെയും സന്ദേശമാണ് പകർന്നുനൽകുന്നതെന്ന് അദ്ദേഹം തന്റെ സന്ദേശത്തിൽ ഓർമ്മിപ്പിച്ചു.
രൂപതാ വികാരി ജനറാൾ മോൺ. ക്ലാരൻസ് പാലിയത്ത്, കത്തീഡ്രൽ വികാരി ഫാ. ആൻസിൽ പീറ്റർ, രൂപതാ ചാൻസിലർ ഫാ. ആന്റണി കുരിശിങ്കൽ, ഫാ. ഷിജോ എബ്രഹാം, ഫാ. ജോമോൻ ചെമ്പകശ്ശേരി, ഫാ. റോബിൻ ബാബു, ഫാ. അബിൻ രാജ് എന്നിവർ സഹകാർമികത്വം വഹിച്ചു.
പ്രാർത്ഥനാഗീതങ്ങൾ ആലപിച്ച് കാരൾ സംഘങ്ങളും ആശംസകളുമായി സാന്താക്ലോസുമാരും എത്തിയതോടെ ആഘോഷങ്ങൾ ഉജ്ജ്വലമായി. പാരീഷ് കൗൺസിലിന്റെ നേതൃത്വത്തിൽ നിർധന കുടുംബങ്ങൾക്കായി ക്രിസ്മസ് കിറ്റുകൾ വിതരണം ചെയ്തു. വ്യാഴാഴ്ച രാവിലെ ഏഴിന് ഇംഗ്ലീഷിലും 8.30-ന് മലയാളത്തിലും ബർണ്ണശ്ശേരി കത്തീഡ്രലിൽ കുർബാന നടക്കും.
About The Author
