കണ്ണൂർ ജില്ലയിൽ 20.14 ലക്ഷം വോട്ടർമാർ; കരട് പട്ടിക പ്രസിദ്ധീകരിച്ചു -

Spread the love

കണ്ണൂർ: നിയമസഭാ തിരഞ്ഞെടുപ്പിന് മുന്നോടിയായുള്ള പുതുക്കിയ കരട് വോട്ടർ പട്ടിക (SIR 2026) കണ്ണൂർ ജില്ലയിൽ പ്രസിദ്ധീകരിച്ചു. ജില്ലയിൽ ആകെ 20,14,608 വോട്ടർമാരാണുള്ളതെന്ന് ജില്ലാ കലക്ടർ അരുൺ കെ. വിജയൻ അറിയിച്ചു. സ്ത്രീ വോട്ടർമാരുടെ എണ്ണത്തിലാണ് വർധനവ് രേഖപ്പെടുത്തിയിരിക്കുന്നത്.

വോട്ടർമാരുടെ കണക്ക്:

• സ്ത്രീകൾ: 10,58,517

• പുരുഷന്മാർ: 9,56,081

• ട്രാൻസ്‌ജെൻഡർ: 10

പട്ടിക പുതുക്കുന്നതിന്റെ ഭാഗമായി വിതരണം ചെയ്ത 21,13,255 എന്യൂമറേഷൻ ഫോറങ്ങളിൽ 20,14,608 എണ്ണം ഡിജിറ്റൈസ് ചെയ്താണ് പട്ടിക തയ്യാറാക്കിയത്. മരിച്ചവർ, സ്ഥിരതാമസമില്ലാത്തവർ, ഇരട്ട വോട്ടുള്ളവർ എന്നിവരെ ഉൾപ്പെടുത്തി തയ്യാറാക്കിയ ASD പട്ടികയിൽ 98,647 പേർ ഉൾപ്പെട്ടിട്ടുണ്ട്. ജില്ലയിൽ 306 പുതിയ പോളിങ് സ്റ്റേഷനുകൾ കൂടി അനുവദിച്ചതോടെ ആകെ പോളിങ് സ്റ്റേഷനുകളുടെ എണ്ണം 2,176 ആയി ഉയർന്നു.

വോട്ടർമാർക്ക് വിവരങ്ങൾ പരിശോധിക്കാനും ആക്ഷേപങ്ങൾ ഉന്നയിക്കാനും 2026 ജനുവരി 22 വരെ സമയം അനുവദിച്ചിട്ടുണ്ട്. അന്തിമ വോട്ടർ പട്ടിക ഫെബ്രുവരി 21-ന് പ്രസിദ്ധീകരിക്കും. വോട്ടർമാർക്ക് https://electoralsearch.eci.gov.in/ എന്ന വെബ്സൈറ്റ് വഴി സ്വന്തം പേര് വിവരങ്ങൾ പരിശോധിക്കാവുന്നതാണ്.