കമ്പിവേലി തകർത്തു; കാര്യസ്ഥനെയും മകനെയും കൊല്ലുമെന്ന് ഭീഷണി; മൂന്നുപേർക്കെതിരെ കേസ്
പെരിങ്ങോം : പറമ്പിൽ അതിക്രമിച്ച് കയറി അതിര് കെട്ടിയ കമ്പിവേലി പൊളിക്കുകയും സ്ഥലം നോക്കി നടത്തുന്ന ആളെയും മകനേയും കൊല്ലുമെന്ന് ഭീഷണിപ്പെടുത്തുകയും ചെയ്തുവെന്ന പരാതിയിൽ മൂന്നു പേർക്കെതിരെ പെരിങ്ങോം പോലീസ് കേസെടുത്തു. ചിറക്കൽ റെയിൽവെ ഗേറ്റിന് സമീപത്തെ തൂണോളിഹൗസിലെ പ്രസാദിൻ്റെ പരാതിയിൽ പെരിങ്ങോത്തെ സെബാസ്റ്റ്യൻ എന്നയാൾക്കും മറ്റു കണ്ടാലറിയാവുന്ന രണ്ടു പേർക്കുമെതിരെയാണ് പോലീസ് കേസെടുത്തത്. ഇക്കഴിഞ്ഞ ജനുവരി 28 ന് ആണ് പ്രതികൾ കമ്പിവേലി തകർത്തത്. 29 ന് ഉച്ചയ്ക്ക് 1.30 മണിക്ക് പരാതിക്കാരൻ സ്ഥലം നോക്കി നടത്തുന്നതിനു ഏല്പിച്ച കൃഷ്ണനെയും മകനേയും പ്രതികൾ കൊല്ലുമെന്ന് ഭീഷണിപ്പെടുത്തുകയും ചെയ്തുവെന്നും പരാതിയിലുണ്ട്. കമ്പിവേലി തകർത്ത് അരലക്ഷം രൂപയുടെ നഷ്ടം സംഭവിച്ചുവെന്ന പരാതിയിൽ കേസെടുത്ത പോലീസ് അന്വേഷണം തുടങ്ങി.
About The Author
