കണ്ണൂരിൽ അതിഥി തൊഴിലാളിയെ കഴുത്തറുത്ത് കൊന്നു, മൃതദേഹം കുളിമുറിയിൽ; സഹോദരി ഭർത്താവ് കസ്റ്റഡിയിൽ
Screenshot
കണ്ണൂർ: കുടിയാന്മലയിൽ അതിഥി തൊഴിലാളിയെ കുളിമുറിയിൽ കഴുത്തറുത്ത് കൊലപ്പെടുത്തിയ നിലയിൽ കണ്ടെത്തി. അസം സ്വദേശി ഫിലിപ്പാണ് കൊല്ലപ്പെട്ടത്. സംഭവവുമായി ബന്ധപ്പെട്ട് ഫിലിപ്പിന്റെ സഹോദരീ ഭർത്താവ് രമേശനെ പോലീസ് കസ്റ്റഡിയിലെടുത്ത് ചോദ്യം ചെയ്തുവരികയാണ്.
കെട്ടിട നിർമാണ ജോലികൾക്കായാണ് അസം സ്വദേശിയായ ഫിലിപ്പും സഹോദരീ ഭർത്താവ് രമേശനും ഉൾപ്പെടെയുള്ളവർ കണ്ണൂരിലെത്തിയത്. ഇരുവരും തമ്മിൽ നേരത്തെ തന്നെ കുടുംബ പ്രശ്നങ്ങൾ നിലനിന്നിരുന്നു. കഴിഞ്ഞ ദിവസം രാത്രിയിലുണ്ടായ തർക്കത്തെ തുടർന്ന് രമേശൻ ഫിലിപ്പിനെ വെട്ടിക്കൊലപ്പെടുത്തുകയായിരുന്നു എന്നാണ് വിവരം. കൊലപാതകത്തിന് ശേഷം മൃതദേഹം കുളിമുറിയിൽ ഒളിപ്പിക്കുകയും ചെയ്തു.
കുളിമുറിയിൽ കഴുത്തറുത്ത നിലയിൽ മൃതദേഹം കണ്ട മറ്റ് അതിഥി തൊഴിലാളികളാണ് പോലീസിൽ വിവരമറിയിച്ചത്. ഉടൻ തന്നെ സ്ഥലത്തെത്തിയ പോലീസ് രമേശനെ കസ്റ്റഡിയിലെടുക്കുകയായിരുന്നു. കൊലപാതകത്തിന് ഉപയോഗിച്ച ആയുധവും പോലീസ് കണ്ടെടുത്തിട്ടുണ്ട്. സംഭവത്തിൽ ഊർജ്ജിതമായ അന്വേഷണവും തുടർനടപടികളും സ്വീകരിച്ചുവരികയാണെന്ന് പോലീസ് അറിയിച്ചു.
About The Author
