‘മഴ, മഴ ഒരു മുഴം മുമ്പെ തില്ലങ്കേരി’; ജനകീയ പങ്കാളിത്തത്തോടെ മഴക്കാലപൂർവ്വ ശുചീകരണത്തിന് തുടക്കം
Screenshot
ഇരിട്ടി (തില്ലങ്കേരി): വരാനിരിക്കുന്ന മഴക്കാലത്തെ നേരിടാനും പകർച്ചവ്യാധികൾ തടയാനുമായി ‘മഴ, മഴ ഒരു മുഴം മുമ്പെ തില്ലങ്കേരി’ എന്ന സന്ദേശവുമായി തില്ലങ്കേരിയിൽ മഴക്കാലപൂർവ്വ ശുചീകരണ പ്രവർത്തനങ്ങൾക്ക് തുടക്കമായി. ജനകീയ പങ്കാളിത്തത്തോടെയാണ് പഞ്ചായത്തിന്റെ വിവിധ ഭാഗങ്ങളിൽ ശുചീകരണം പുരോഗമിക്കുന്നത്.
ശുചീകരണ പ്രവർത്തനങ്ങൾ:
പഞ്ചായത്ത് അതിർത്തിയായ തെക്കം പൊയിൽ നെല്യാട്ടേരി റോഡ് കവല മുതൽ തില്ലങ്കേരി ടൗൺ വരെ റോഡിനിരുവശവുമുള്ള കാടുകൾ വെട്ടിമാറ്റിയും പ്ലാസ്റ്റിക് ഉൾപ്പെടെയുള്ള മാലിന്യങ്ങൾ നീക്കം ചെയ്തുമാണ് ശുചീകരണ പ്രവർത്തനങ്ങൾ നടന്നത്. ഹരിതകർമസേനാംഗങ്ങൾ, കുടുംബശ്രീ പ്രവർത്തകർ, തൊഴിലുറപ്പ് തൊഴിലാളികൾ, വിവിധ സന്നദ്ധ സംഘടനാ പ്രവർത്തകർ തുടങ്ങിയവർ ഈ ജനകീയ ഉദ്യമത്തിൽ പങ്കാളികളായി. നേരത്തെ വ്യാപാരികളുടെ സഹകരണത്തോടെ തില്ലങ്കേരി ടൗണും പരിസരവും ശുചീകരിച്ചിരുന്നു. ഇതിന്റെ തുടർച്ചയായി ഈ മാസം 26 ന് കടുക്കാപ്പാലം മുതൽ ആലാച്ചി കുണ്ടുതോട് വരെയുള്ള റോഡിനിരുവശവും ശുചീകരിക്കും.
ഉദ്ഘാടനം:
ശുചീകരണ പ്രവർത്തനങ്ങൾ പഞ്ചായത്ത് പ്രസിഡന്റ് മുരളീധരൻ കൈതേരി ഉദ്ഘാടനം ചെയ്തു. ബ്ലോക്ക് പഞ്ചായത്ത് അംഗം അജയൻ പായം അധ്യക്ഷത വഹിച്ചു. പഞ്ചായത്ത് സ്ഥിരം സമിതി അധ്യക്ഷന്മാരായ സി.വി. രാധാകൃഷ്ണൻ, കെ.കെ. ശ്രീദേവി, പഞ്ചായത്ത് അംഗങ്ങളായ പി.വി. സുരേന്ദ്രൻ, കെ.ആർ. അനിൽ, എം.കെ. ആനന്ദവല്ലി, പ്രമീള തുടങ്ങിയവർ സംസാരിച്ചു.
About The Author
