പയ്യന്നൂർ ബൈപ്പാസ് നവീകരണം ആരംഭിച്ചു
പയ്യന്നൂർ: പയ്യന്നൂർ ബൈപ്പാസ് റോഡിന്റെ മെക്കാഡം ടാറിങ് പ്രവൃത്തികൾ ആരംഭിച്ചു. റോഡ് നവീകരണ ടെൻഡറിന് ശനിയാഴ്ച ചേർന്ന കൗൺസിൽ യോഗം അംഗീകാരം നൽകിയതിനെ തുടര്ന്ന് തിങ്കളാഴ്ച രാവിലെ പ്രവൃത്തി ആരംഭിച്ചു.
പഴയ ടാറിങ് കിളച്ച് മാറ്റുന്ന ജോലിയാണ് ആദ്യം ആരംഭിച്ചത്. തുടർന്ന് പൂർണ്ണമായ മെക്കാഡം ടാറിങ് നടത്തും. 45 ലക്ഷം രൂപ സംസ്ഥാന സർക്കാരിന്റെ ഗ്രാമീണ റോഡുകളുടെ നവീകരണ ഫണ്ടും, ഒന്നര കോടി രൂപ നഗരസഭയുടെ തനതു ഫണ്ടും ഉൾപ്പെടെ ആകെ 2.25 കോടി രൂപ ചെലവഴിച്ചാണ് നവീകരണം നടക്കുന്നത്.
പെരുമ്പ ദേശീയപാത മുതൽ എൽഐസി കവല വരെയാണ് മെക്കാഡം ടാറിങ്. എൽഐസി മുതൽ ബികെഎം കവല വരെ റീ-ടാറിങ് നടത്തും. റീ-ടാറിങ് പ്രവൃത്തിക്ക് 30 ലക്ഷം രൂപയാണ് ചെലവ് കണക്കാക്കിയത്. റോഡ് മുഴുവൻ കിളച്ച് ആവശ്യമായ സ്ഥലങ്ങളിൽ ഒന്നര അടിവരെ ഉയർത്തി ടാറിങ് നടത്തും. ഇരു ഭാഗങ്ങളിലും കോൺക്രീറ്റ് ഓവ് ചാലുകളും നിർമിക്കും.
ബൈപ്പാസ് നവീകരണവുമായി ബന്ധപ്പെട്ട് പയ്യന്നൂർ ടൗണിൽ ഗതാഗത നിയന്ത്രണം ഏർപ്പെടുത്തിയിട്ടുണ്ട്. ബൈപ്പാസ് വഴി പോകേണ്ട ബസുകൾ അടക്കമുള്ള വാഹനങ്ങൾ താൽക്കാലികമായി സെൻട്രൽ ബസാർ വഴിയാണ് കടത്തിവിടുന്നത്. ഇതുമൂലം ടൗണിൽ ഗതാഗതക്കുരുക്ക് വർധിക്കുമോ എന്ന ആശങ്കയും ഉയരുന്നു.
ദീപാവലി അവധി ദിനമായ തിങ്കളാഴ്ചയും ടൗണിൽ ഗതാഗതക്കുരുക്ക് അനുഭവപ്പെട്ടതായി റിപ്പോർട്ടുകൾ. ടാറിങ് പ്രവൃത്തികൾ നടക്കുന്നതിനാൽ മെയിൻ റോഡിന്റെ ഇരുവശങ്ങളിലുമുള്ള വാഹന പാർക്കിങ് നിരോധിച്ചിട്ടുണ്ടെങ്കിലും, ടു-വീലറുകൾ പതിവുപോലെ റോഡരികിൽ പാർക്ക് ചെയ്തതും ഗതാഗതത്തിന് ബുദ്ധിമുട്ടുണ്ടാക്കി.
About The Author
