കലാകിരീടവുമായി കണ്ണൂരിന്റെ മക്കൾ മടങ്ങിയെത്തി; ജില്ലയിൽ ആവേശകരമായ സ്വീകരണം -

Spread the love

കണ്ണൂർ: തൃശ്ശൂരിൽ നടന്ന 64-ാമത് കേരള സ്കൂൾ കലോത്സവത്തിൽ സ്വർണ്ണക്കപ്പിൽ മുത്തമിട്ട കണ്ണൂർ ടീമിന് ജില്ലയിലാകെ ഉജ്ജ്വല സ്വീകരണം. വാദ്യമേളങ്ങളുടെയും ആഹ്ലാദ പ്രകടനങ്ങളുടെയും അകമ്പടിയോടെയാണ് വിജയികളെ നാട് വരവേറ്റത്.

മന്ത്രിയുടെ നേതൃത്വത്തിൽ സ്വീകരണം:

ജില്ലാ അതിർത്തിയായ മാഹിയിൽ വെച്ച് മന്ത്രി രാമചന്ദ്രൻ കടന്നപ്പള്ളിയുടെ നേതൃത്വത്തിൽ വിദ്യാർത്ഥികളെ സ്വീകരിച്ചു. കണ്ണൂരിന്റെ സാംസ്കാരികവും വൈജ്ഞാനികവുമായ പ്രബുദ്ധത വിളംബരം ചെയ്യുന്നതാണ് ഈ വിജയമെന്ന് മന്ത്രി പറഞ്ഞു. വിദ്യാർത്ഥികളുടെയും അധ്യാപകരുടെയും രക്ഷിതാക്കളുടെയും കൂട്ടായ പരിശ്രമമാണ് ജില്ലയെ ഒന്നാമതെത്തിച്ചതെന്നും അദ്ദേഹം കൂട്ടിച്ചേർത്തു.

ജില്ലാ പഞ്ചായത്ത് പ്രസിഡന്റ് അഡ്വ. ബിനോയ് കുര്യൻ അധ്യക്ഷത വഹിച്ച ചടങ്ങിൽ കെ.വി. സുമേഷ് എം.എൽ.എ, ജില്ലാ പഞ്ചായത്ത് വൈസ് പ്രസിഡന്റ് ടി. ശബ്ന, വിവിധ സ്ഥിരം സമിതി അധ്യക്ഷന്മാരായ എ. പ്രദീപൻ, പി. രവീന്ദ്രൻ തുടങ്ങിയവർ പങ്കെടുത്തു.

ആവേശമായി റോഡ് ഷോ:

മാഹിയിൽ നിന്നാരംഭിച്ച സ്വീകരണ ഘോഷയാത്ര തലശ്ശേരി, ധർമ്മടം, മുഴപ്പിലങ്ങാട്, എടക്കാട്, തോട്ടട, താഴെ ചൊവ്വ വഴി കണ്ണൂർ നഗരത്തിൽ സമാപിച്ചു. ഓരോ കേന്ദ്രങ്ങളിലും നൂറുകണക്കിന് ആളുകളാണ് വിജയികളെ കാണാൻ തടിച്ചുകൂടിയത്. നഗരത്തിൽ നടന്ന പ്രധാന ചടങ്ങിൽ ജനപ്രതിനിധികളും വിദ്യാഭ്യാസ വകുപ്പ് ഉദ്യോഗസ്ഥരും ചേർന്ന് ടീം അംഗങ്ങളെയും പരിശീലകരെയും അനുമോദിച്ചു.

ഡി.ഡി.ഇ ഡി. ഷൈനി, ഡി.ഇ.ഒ പി. ശകുന്തള, എസ്.എസ്.കെ ജില്ലാ കോ-ഓർഡിനേറ്റർ ഇ. വിനോദ് തുടങ്ങി വിദ്യാഭ്യാസ മേഖലയിലെ പ്രമുഖരും വിവിധ പഞ്ചായത്ത് പ്രതിനിധികളും സ്വീകരണ പരിപാടികളിൽ പങ്കാളികളായി.