ഇരിട്ടിയിൽ ഗതാഗതക്കുരുക്ക് രൂക്ഷം; നഗരത്തെ ശ്വാസംമുട്ടിച്ച് ക്രിസ്മസ് തിരക്കും

ഇരിട്ടി: നഗരത്തിൽ പുതിയ പാലം യാഥാർത്ഥ്യമായതിന് ശേഷമുള്ള ഏറ്റവും രൂക്ഷമായ ഗതാഗതക്കുരുക്കിന് സാക്ഷ്യം വഹിച്ച് ഇരിട്ടി. കഴിഞ്ഞ മൂന്ന് ദിവസമായി തുടരുന്ന ഗതാഗത സ്തംഭനം ബുധനാഴ്ചയും നിയന്ത്രണാതീതമായി തുടർന്നു. കീഴൂർ മുതൽ ഇരിട്ടി പുതിയ പാലം കവല വരേയും, കല്ലുംമുട്ടി മുതൽ പുതിയ പാലം വരേയും വാഹനങ്ങളുടെ നീണ്ട നിരയാണ് ദൃശ്യമായത്.

തിരക്കിന് പിന്നിലെ പ്രധാന കാരണങ്ങൾ:

• ക്രിസ്മസ് – പുതുവത്സര തിരക്ക്: മലയോര മേഖലയിൽ നിന്നുള്ളവർ ആഘോഷങ്ങൾക്കായി കൂട്ടത്തോടെ നഗരത്തിലേക്ക് എത്തിയതും തിരക്കിന് കാരണമായി.

• അമിത ബസ് ചാർജ്ജ്: ബാംഗ്ലൂർ ഉൾപ്പെടെയുള്ള സ്ഥലങ്ങളിൽ നിന്നുള്ള ടൂറിസ്റ്റ് ബസ്സുകൾ ഇരട്ടി ചാർജ്ജ് ഈടാക്കുന്നതും ബുക്കിംഗ് ലഭ്യമല്ലാത്തതും കാരണം പ്രവാസികൾ കുടുംബസമേതം സ്വന്തം കാറുകളിൽ നാട്ടിലേക്ക് തിരിച്ചത് വാഹനപ്പെരുപ്പത്തിന് ഇടയാക്കി.

• കുടകിലേക്കുള്ള വിനോദസഞ്ചാരികൾ: കൊടുംതണുപ്പ് ആസ്വദിക്കാൻ കുടകിലേക്ക് പോകുന്ന വിനോദസഞ്ചാരികളുടെ വലിയ ഒഴുക്ക് ഇരിട്ടി – കൂട്ടുപുഴ റൂട്ടിൽ വലിയ തിരക്കുണ്ടാക്കി.

• പഴയപാലം അടച്ചിട്ടത്: കെഎസ്ആർടിസി ബസ് ഇടിച്ചുണ്ടായ അപകടത്തെത്തുടർന്ന് പഴയപാലം അടച്ചിട്ടിട്ട് രണ്ട് മാസത്തോളമായി. പാലത്തിന്റെ അറ്റകുറ്റപ്പണി വൈകുന്നതിനാൽ നഗരത്തിലെ വൺവേ സംവിധാനം പുനഃസ്ഥാപിക്കാൻ കഴിയാത്തതാണ് കുരുക്ക് രൂക്ഷമാക്കുന്നത്.

പോലീസ് ഇടപെടൽ

പാലം കവലയിൽ വാഹനങ്ങൾ വിവിധ ദിശകളിലേക്ക് തിരിഞ്ഞുപോകുന്നതാണ് പ്രധാനമായും തടസ്സമുണ്ടാക്കുന്നത്. ഗതാഗതം നിയന്ത്രിക്കാനായി കൂടുതൽ പോലീസിനെയും ഹോംഗാർഡിനെയും ഇരിട്ടി പാലത്തിലും ടൗണിലും വിന്യസിച്ചിട്ടുണ്ട്. നഗരത്തിൽ നടക്കുന്ന വിവിധ ആഘോഷ പരിപാടികളും തിരക്കിന്റെ ആക്കം കൂട്ടുന്നു.

About The Author