കോൺഗ്രസിൽ നിന്ന് എം.എൽ.എ രാഹുൽ മാങ്കൂട്ടത്തിലിനെ പുറത്താക്കി
തിരുവനന്തപുരം: ബലാത്സംഗക്കേസിൽ ആരോപണവിഷയനായ രാഹുൽ മാങ്കൂട്ടത്തിൽ എം.എൽ.എയെ കോൺഗ്രസ് പാർട്ടി പ്രാഥമിക അംഗത്വത്തിൽ നിന്നു പുറത്താക്കി. മുൻകൂർ ജാമ്യാപേക്ഷ കോടതി തള്ളിയതിനെ തുടർന്ന് കെ.പി.സി.സി പ്രസിഡന്റ് സണ്ണി ജോസഫ് എം.എൽ.എ പുറത്താക്കൽ ഉത്തരവ് അറിയിച്ചു.
യുവതി നേരിട്ടെത്തി നൽകിയ പരാതിയുടെ അടിസ്ഥാനത്തിൽ കേസ് രജിസ്റ്റർ ചെയ്തതോടെയാണ് രാഹുലിനെ പാർട്ടിയിൽനിന്ന് നീക്കണമെന്ന് മുതിർന്ന നേതാക്കൾ ആവശ്യപ്പെട്ടത്. തദ്ദേശ തിരഞ്ഞെടുപ്പ് അടുത്തിരിക്കെ വിഷയം പാർട്ടിയെ പ്രതിരോധത്തിലാക്കിയതും പുറത്താക്കലിന് കാരണം ആയി. തീരുമാനം ഹൈക്കമാൻഡിന്റെ അനുമതിയോടെ നടപ്പാക്കി.
ഇതിനിടെ, തിരുവനന്തപുരത്തെ പ്രിൻസിപ്പൽ സെഷൻസ് കോടതി രാഹുലിന്റെ മുൻകൂർ ജാമ്യാപേക്ഷ തള്ളിയിരുന്നു. പ്രാഥമികമായി ശക്തമായ തെളിവുകൾ ഉള്ളതിനാൽ അറസ്റ്റ് തടയാനാകില്ലെന്ന് കോടതി വ്യക്തമാക്കിയിരുന്നു. കഴിഞ്ഞ എട്ട് ദിവസമായി രാഹുൽ ഒളിവിലാണ്.
വലിയമല പൊലീസ് രജിസ്റ്റർ ചെയ്ത് നേമം പൊലീസിന് കൈമാറിയ കേസിൽ ബലാത്സംഗം, നിർബന്ധിതഭ്രൂണഹത്യ, ക്രൂരമർദനം, ഐ.ടി. ആക്ട് ലംഘനം തുടങ്ങി ഗൗരവമായ വകുപ്പുകൾ ചുമത്തിയിട്ടുണ്ട്. യുവതിയുമായുള്ള ബന്ധം ഇരുവരുടെയും സമ്മതപ്രകാരമാണെന്നും ആരോപണങ്ങൾ രാഷ്ട്രീയ ലക്ഷ്യത്തോടെയുള്ളതാണെന്നും രാഹുൽ വാദിച്ചിരുന്നുവെങ്കിലും അന്വേഷണസംഘം ശക്തമായ തെളിവുകൾ കോടതിയിൽ സമർപ്പിച്ചിരുന്നു.
About The Author
