ആളില്ലാത്ത വീട്ടിൽ മോഷണം; നാടോടി സംഘത്തിലെ ഏഴോളം സ്ത്രീകളെ നാട്ടുകാർ പിടികൂടി പൊലീസിൽ ഏൽപ്പിച്ചു
ഇരിട്ടി: വട്ട്യറയിൽ ആളില്ലാത്ത വീട്ടിൽ അതിക്രമിച്ചുകയറി വീട്ടുപകരണങ്ങൾ മോഷ്ടിച്ചെന്നാരോപിച്ച് നാടോടി സംഘത്തിലെ ഏഴോളം സ്ത്രീകളെ നാട്ടുകാർ പിടികൂടി പൊലീസിൽ ഏൽപ്പിച്ചു. പിഞ്ചുകുഞ്ഞുങ്ങളുമായെത്തിയ സംഘത്തെ ബുധനാഴ്ചയാണ് നാട്ടുകാർ തടഞ്ഞുവെച്ചത്.
പായം പഞ്ചായത്തിലെ കരിയാൽ, പായം, കാടമുണ്ട, വട്ട്യറ മേഖലകളിൽ പാഴ്‌വസ്തുക്കൾ ശേഖരിക്കാനെന്ന പേരിൽ എത്തിയ സംഘമാണ് നാട്ടുകാരുടെ ശ്രദ്ധയിൽപ്പെട്ടതും പിന്നീട് സംശയത്തിന് ഇടയാക്കിയതും. വട്ട്യറയിൽ റോഡരികിൽ ചാക്കിൽ കെട്ടി ഒളിപ്പിച്ച നിലയിൽ ഓട്ടുപാത്രങ്ങളും ഇലക്ട്രോണിക്സ് ഉപകരണങ്ങളും കണ്ടതോടെയാണ് നാട്ടുകാർക്ക് സംശയം തോന്നിയത്.
തുടർന്ന് നടത്തിയ പരിശോധനയിൽ, പാഴ്‌വസ്തുക്കൾ ശേഖരിക്കാനെത്തിയ ഈ സംഘം സമീപത്തെ ആളൊഴിഞ്ഞ വീടിന്റെ പൂട്ട് തകർത്ത് അകത്തുകയറി സാധനങ്ങൾ മോഷ്ടിച്ചതാണെന്ന് വ്യക്തമായി. നാട്ടുകാർ സംഘത്തെ തടഞ്ഞുവെച്ച് ചാക്കുകൾ പരിശോധിച്ചപ്പോഴാണ് നിരവധി വീട്ടുപകരണങ്ങൾ കണ്ടെടുത്തത്. വിവരം ലഭിച്ചതിനെ തുടർന്ന് സ്ഥലത്തെത്തിയ ഇരിട്ടി പോലീസ് നാടോടി സംഘത്തെ കസ്റ്റഡിയിലെടുത്തു. സംഭവത്തിൽ പോലീസ് കൂടുതൽ അന്വേഷണം ആരംഭിച്ചിട്ടുണ്ട്.
About The Author
