മകളുടെ പിറന്നാൾ ദിനത്തിൽ നൂറിലേറെ പുസ്തകങ്ങൾ വായനശാലയ്ക്ക് സമ്മാനിച്ച് മാതാപിതാക്കൾ.
തൃക്കരിപ്പൂർ: മകളുടെ പിറന്നാൾ ദിനം അർത്ഥവത്തായൊരു വായനാദിനമാക്കി മാതാപിതാക്കൾ. മൈത്താണി ചൂരിക്കാടൻ കൃഷ്ണൻ നായർ സ്മാരക വായനശാല ആൻ്റ് ഗ്രന്ഥാലയത്തിന്റെ ഗ്രന്ഥശാല വാരാചരണ പ്രവർത്തനങ്ങളുടെ ഭാഗമായി, ഗ്രന്ഥശാലയുടെ മുൻ താലൂക്ക് കൗൺസിൽ അംഗം പി. സദാനന്ദനും ഭാര്യ പി. പ്രേമലതയും ചേർന്ന് മകൾ പാർവ്വതിയുടെ പിറന്നാൾ ദിനത്തിൽ തങ്ങളുടെ ജീവിതസമ്പാദ്യമായി സൂക്ഷിച്ചിരുന്ന നൂറിലേറെ പുസ്തകങ്ങൾ ഗ്രന്ഥശാലയ്ക്ക് കൈമാറി.
വായനയോടുള്ള സ്നേഹവും പുസ്തകങ്ങളോടുള്ള അടുപ്പവും പുതുതലമുറയിലേക്ക് പകരുക എന്ന ലക്ഷ്യത്തോടെയാണ് പുസ്തകങ്ങൾ ഗ്രന്ഥശാലയ്ക്ക് സമർപ്പിച്ചത്. പിറന്നാൾ ആഘോഷം കേവലം കുടുംബാഘോഷമായി ഒതുക്കാതെ, അറിവിന്റെ വാതിലുകൾ കൂടുതൽ ആളുകൾക്കായി തുറക്കുന്നതിനുള്ള അവസരമാക്കി മാറ്റിയ ഈ പ്രവർത്തനം ശ്രദ്ധേയമായി.
ഗ്രന്ഥശാല സെക്രട്ടറി പി. രാജഗോപാലൻ, വനിതാവേദി പ്രവർത്തക നന്ദന പി.കെ., ലൈബ്രേറിയൻ കീർത്തി എം.വി എന്നിവർ ചേർന്ന് പുസ്തകങ്ങൾ ഏറ്റുവാങ്ങി. ഗ്രന്ഥശാലയുടെ പുസ്തകശേഖരത്തിന് കൂടുതൽ വൈവിധ്യവും സമ്പന്നതയും നൽകുന്ന ഈ സംഭാവന വായനക്കാരുടെ പ്രയോജനത്തിനായി ഉപയോഗപ്പെടുത്തുമെന്ന് ഭാരവാഹികൾ അറിയിച്ചു.
About The Author
