അഴീക്കോട് എൽ.ഡി.എഫ് തെരഞ്ഞെടുപ്പ് കൺവെൻഷൻ സംഘടിപ്പിച്ചു; കോൺഗ്രസിനെതിരെ രൂക്ഷവിമർശനവുമായി ഇ.പി. ജയരാജൻ

കണ്ണൂർ (അഴീക്കോട്): വരാനിരിക്കുന്ന നിയമസഭാ തെരഞ്ഞെടുപ്പിന് മുന്നോടിയായി അഴീക്കോട് മണ്ഡലം എൽ.ഡി.എഫ് തെരഞ്ഞെടുപ്പ് കൺവെൻഷൻ സംഘടിപ്പിച്ചു. പാപ്പിനിശ്ശേരി ബാങ്കിന് സമീപം നടന്ന കൺവെൻഷൻ സി.പി.എം കേന്ദ്ര കമ്മിറ്റി അംഗം ഇ.പി. ജയരാജൻ ഉദ്ഘാടനം ചെയ്തു. എൽ.ഡി.എഫ് സ്ഥാനാർഥി കെ.വി. സുമേഷ് മണ്ഡലത്തിൽ കഴിഞ്ഞ അഞ്ചുവർഷം കൊണ്ട് നടപ്പിലാക്കിയ 5962 കോടിയുടെ വികസന പ്രവർത്തനങ്ങൾ സദസ്സിൽ വിശദീകരിച്ചു.

യു.ഡി.എഫിനെതിരെ ഇ.പി. ജയരാജൻ:

കോൺഗ്രസ് ഗ്രൂപ്പുകളായി തിരിഞ്ഞ് തമ്മിലടിക്കാൻ മത്സരിക്കുകയാണെന്ന് ഉദ്ഘാടന പ്രസംഗത്തിൽ ഇ.പി. ജയരാജൻ ആരോപിച്ചു. തെരഞ്ഞെടുപ്പ് പ്രഖ്യാപിച്ചിട്ട് ഇത്രയും ദിവസമായിട്ടും സ്ഥാനാർഥികളെ പ്രഖ്യാപിക്കാൻ അവർക്ക് കഴിയുന്നില്ല. തമ്മിലടിച്ച് ലക്ഷ്യബോധമില്ലാത്തവരായി മാറിയ ഒരു മുന്നണിക്ക് കേരളത്തെ നയിക്കാൻ സാധിക്കില്ലെന്നും അദ്ദേഹം പറഞ്ഞു.

“കേരളത്തിന്റെ ഇതുവരെയുള്ള വളർച്ചയ്ക്ക് അടിസ്ഥാനം ഇടതുപക്ഷമാണ്. അതിദാരിദ്ര്യം ഇല്ലാത്ത നാടായി കേരളത്തെ മാറ്റാൻ സാധിച്ചു. ഇടതുപക്ഷം അധികാരത്തിൽ വന്നപ്പോൾ സാമ്പത്തിക പരിമിതികൾ മനസ്സിലാക്കി കിഫ്ബി രൂപീകരിക്കുകയും സമാനതകളില്ലാത്ത വികസന പ്രവർത്തനങ്ങൾ യാഥാർഥ്യമാക്കുകയും ചെയ്തു. ഇതിനെതിരെ വ്യാജപ്രചാരണങ്ങൾ നടത്തി കിഫ്ബിയെ പൊളിക്കാൻ ശ്രമിച്ചവരാണ് യു.ഡി.എഫുകാർ” – ഇ.പി. ജയരാജൻ കൂട്ടിച്ചേർത്തു.

തെരഞ്ഞെടുപ്പ് കമ്മിറ്റി രൂപീകരിച്ചു:

മണ്ഡലം കൺവീനർ പി. ചന്ദ്രൻ അധ്യക്ഷനായ ചടങ്ങിൽ 201 അംഗ തെരഞ്ഞെടുപ്പ് കമ്മിറ്റിയെ തെരഞ്ഞെടുത്തു.

• ചെയർമാൻ: പി. ചന്ദ്രൻ

• സെക്രട്ടറി: എം. പ്രകാശൻ

• ജോയിന്റ് സെക്രട്ടറിമാർ: പി. രമേശ് ബാബു, കെ.എം. സപ്ന, എം. പ്രഭാകരൻ, കെ. ഗിരീഷ് കുമാർ, പി. പവിത്രൻ, പോത്തോടി സജീവൻ, കെ. ബൈജു, കെ. ലത, എ. സുനിൽ കുമാർ, എൽ.വി. മുഹമ്മദ്, ഷമീം വളപട്ടണം.

• വൈസ് ചെയർമാൻമാർ: ജെയിംസ് മാത്യൂ, അരക്കൻ ബാലൻ, കെ. നാരായണൻ, പി. പ്രശാന്തൻ, എം. അനിൽ കുമാർ, കെ. മോഹനൻ, സലീല, കെ. പ്രദീപൻ, കെ.പി. ജയബാലൻ, കെ.വി. ഷക്കീൽ, ഡോ. ബാലകൃഷ്ണ പൊതുവാൾ, പ്രശാന്ത് കൃഷ്ണൻ, സി. രത്നാകരൻ, മുഹമ്മദ് റാഫി.

സി.പി.ഐ ജില്ലാ സെക്രട്ടറി സി.പി. സന്തോഷ് കുമാർ, സി.പി.എം സംസ്ഥാന കമ്മിറ്റി അംഗം ടി.വി. രാജേഷ്, ജില്ലാ സെക്രട്ടറിയറ്റ് അംഗം എൻ. സുകന്യ, എൽ.ഡി.എഫ് നേതാക്കളായ കെ.പി. പ്രശാന്ത്, എം.പി. മുരളി, വെള്ളോറ രാജൻ, രതീഷ് ചിറക്കൽ, സി.പി. ദിനേശൻ എന്നിവർ കൺവെൻഷനിൽ സംസാരിച്ചു.

About The Author