തെയ്യക്കാഴ്ചകളുടെ ദൃശ്യവിസ്മയവുമായി ‘തിറം’; വനിത കോളേജിലെ ഫോട്ടോ പ്രദർശനം ശ്രദ്ധേയമാകുന്നു
കണ്ണൂർ: വടക്കൻ കേരളത്തിന്റെ അനുഷ്ഠാന കലയായ തെയ്യത്തെ ക്യാമറക്കണ്ണുകളിലൂടെ ആവിഷ്കരിച്ച ‘തിറം’ ഫോട്ടോ പ്രദർശനം ശ്രദ്ധേയമാകുന്നു. കണ്ണൂർ കൃഷ്ണമേനോൻ സ്മാരക ഗവ. വനിത കോളേജിന്റെ സുവർണ്ണ ജൂബിലി ആഘോഷങ്ങളുടെ ഭാഗമായാണ് പ്രദർശനം സംഘടിപ്പിച്ചിരിക്കുന്നത്.
ആകാശവാണി മുൻ മേധാവിയും ഫോക്ലോർ ഗവേഷകനുമായ ബാലകൃഷ്ണൻ കൊയ്യാൽ കഴിഞ്ഞ മൂന്ന് പതിറ്റാണ്ടുകളായി പകർത്തിയ അപൂർവ്വ ചിത്രങ്ങളാണ് പ്രദർശനത്തിലുള്ളത്. തെയ്യക്കോലങ്ങൾ, മുഖത്തെഴുത്ത്, മുടി അലങ്കാരങ്ങൾ, അപൂർവ്വമായ അനുഷ്ഠാന മുറകൾ എന്നിവയ്ക്ക് പുറമെ തെയ്യക്കാവുകളുടെ പാരിസ്ഥിതിക പ്രത്യേകതകൾ വിളിച്ചോതുന്ന ചിത്രങ്ങളും ‘തിറം’ പ്രദർശനത്തെ വേറിട്ടതാക്കുന്നു.
വിവിധ വിദ്യാഭ്യാസ സ്ഥാപനങ്ങളിൽ നിന്നുള്ള നൂറുകണക്കിന് വിദ്യാർത്ഥികളും അധ്യാപകരും ഗവേഷകരും ഇതിനോടകം പ്രദർശനം കാണാനെത്തി. തെയ്യത്തെക്കുറിച്ചുള്ള ആഴത്തിലുള്ള അറിവ് പകരുന്നതാണ് ഈ ചിത്രങ്ങളെന്ന് സന്ദർശകർ അഭിപ്രായപ്പെട്ടു.
പ്രദർശന സമയം:
കോളേജ് ഓഡിറ്റോറിയത്തിൽ നടക്കുന്ന പ്രദർശനം ജനുവരി 17 വരെ തുടരും. രാവിലെ 10 മണി മുതൽ വൈകുന്നേരം 5 മണി വരെയാണ് പൊതുജനങ്ങൾക്ക് പ്രവേശനം അനുവദിച്ചിരിക്കുന്നത്.
About The Author
