മാതമംഗലത്ത് കുഞ്ഞികൃഷ്ണൻ അനുകൂലിയുടെ കാർ കത്തിച്ച സംഭവം; രണ്ട് സി.പി.എം പ്രവർത്തകർ അറസ്റ്റിൽ -

Spread the love

മാതമംഗലം / പയ്യന്നൂർ: പയ്യന്നൂരിൽ യു.ഡി.എഫ് പിന്തുണയോടെ സ്വതന്ത്രനായി മത്സരിച്ച വി. കുഞ്ഞികൃഷ്ണനെ അനുകൂലിക്കുന്നവരുടെ വീടുകൾക്കും സ്വത്തുക്കൾക്കും നേരെ തിരഞ്ഞെടുപ്പിന് പിന്നാലെ വ്യാപക ആക്രമണങ്ങൾ. അക്രമ സംഭവങ്ങളിൽ പോലീസ് മെല്ലേപ്പോക്കിലാണെന്ന ആക്ഷേപം ശക്തമാകുന്നതിനിടെ, മാതമംഗലത്ത് കുഞ്ഞികൃഷ്ണൻ അനുകൂലിയുടെ കാർ കത്തിച്ച കേസിൽ രണ്ട് സി.പി.എം പ്രവർത്തകർ അറസ്റ്റിലായി. സുധീഷ്, അജയ് കൃഷ്ണ എന്നിവരെയാണ് പോലീസ് അറസ്റ്റ് ചെയ്തത്.

വി. കുഞ്ഞികൃഷ്ണനെ പിന്തുണച്ച ടി. പുരുഷോത്തമന്റെ കാർ കത്തിക്കുകയും വീട് ആക്രമിക്കുകയും ചെയ്ത കേസിലാണ് അറസ്റ്റ് രേഖപ്പെടുത്തിയത്. കഴിഞ്ഞ ദിവസം അർധരാത്രി ഒരു മണിയോടെയാണ് ഈ ആക്രമണമുണ്ടായത്. വീടിന്റെ ജനൽച്ചില്ലുകൾ അടിച്ച് തകർത്ത അക്രമികൾ മുറ്റത്ത് നിർത്തിയിട്ടിരുന്ന കാറിന് തീയിടുകയായിരുന്നു. കാറിൽ നിന്നും തീ ആളിക്കത്തുന്നത് കണ്ടാണ് പുരുഷോത്തമനും കുടുംബാംഗങ്ങളും ഉണർന്ന് പുറത്തേക്കിറങ്ങിയത്. ആക്രമണം നടത്തിയ ശേഷം ഓടിപ്പോയത് സി.പി.ഐ.എം പ്രവർത്തകരാണെന്ന് പുരുഷോത്തമൻ തുടക്കത്തിൽ തന്നെ ആരോപിച്ചിരുന്നു.