അഴീക്കോട് ഓലാടത്താഴയിൽ കട്ടപതിക്കൽ അശാസ്ത്രീയം; റോഡിൽ തെന്നിവീണ് അപകടങ്ങൾ പതിവാകുന്നു
അഴീക്കോട്: ഓലാടത്താഴ ഭാഗത്ത് റോഡിന് സമീപം നടപ്പാതയിൽ കൊരുപ്പുകട്ട (Interlock) സ്ഥാപിക്കുന്നത് അശാസ്ത്രീയമാണെന്ന് പരാതി. റോഡുമായി കൃത്യമായ ബന്ധമില്ലാത്ത രീതിയിൽ, കുന്നിറക്കം മുതൽ 200 മീറ്ററോളം ദൂരത്തിലാണ് കട്ട പതിപ്പിച്ചിരിക്കുന്നത്. കട്ടകൾക്കിടയിൽ താൽക്കാലികമായി കരിങ്കൽപ്പൊടി വിതറിയത് ഇരുചക്രവാഹനങ്ങൾക്കും കാൽനടയാത്രക്കാർക്കും ഭീഷണിയാകുന്നു.
റോഡിന് സമാന്തരമല്ലാത്ത രീതിയിൽ കട്ട പതിപ്പിച്ചതും അതിനു മുകളിൽ വിതറിയ കരിങ്കൽപ്പൊടിയുമാണ് വില്ലനാകുന്നത്. രാത്രികാലങ്ങളിൽ ഈ വഴി പോകുന്നവർ തെന്നിവീഴുന്നത് പതിവായിരിക്കുകയാണ്. പ്രത്യേകിച്ച് കുന്നിറക്കമായതിനാൽ ഇരുചക്രവാഹനങ്ങൾ നിയന്ത്രണം വിട്ട് മറിയുന്ന സാഹചര്യമാണുള്ളത്.
അധികൃതരുടെ വിശദീകരണം
ഭാവിയിൽ അലവിൽ മുതൽ റോഡ് ടാർ ചെയ്യുമ്പോൾ, റോഡ് ഉയർത്തുമെന്നും അപ്പോൾ കൊരുപ്പുകട്ടയ്ക്ക് സമാന്തരമായി റോഡ് മാറുമെന്നുമാണ് അധികൃതർ നൽകുന്ന വിശദീകരണം. ടാറിങ്ങിനായി ടെൻഡർ നടപടികൾ പൂർത്തിയായിട്ടുണ്ടെങ്കിലും പണി എന്ന് തുടങ്ങുമെന്ന് വ്യക്തമല്ല. അതുവരെ ഈ അപകടാവസ്ഥ തുടരുന്നത് നാട്ടുകാർക്കിടയിൽ വലിയ പ്രതിഷേധത്തിന് കാരണമായിട്ടുണ്ട്. ശാസ്ത്രീയമായ രീതിയിൽ സുരക്ഷാ ക്രമീകരണങ്ങൾ ഒരുക്കിയ ശേഷം മാത്രമേ നിർമ്മാണം തുടരാവൂ എന്നാണ് പ്രദേശവാസികളുടെ ആവശ്യം.
About The Author
