കായിക മേഖലയിൽ കേരളം ഒന്നാമത്; 10 വർഷത്തിനിടെ നടപ്പാക്കിയത് 4000 കോടിയുടെ പദ്ധതികൾ: മന്ത്രി വി. അബ്ദുറഹ്മാൻ
അഴീക്കോട്: കായിക മേഖലയിലെ പശ്ചാത്തല സൗകര്യവികസനത്തിനായി കഴിഞ്ഞ പത്തുവർഷത്തിനിടെ സർക്കാർ 4000 കോടി രൂപയുടെ പദ്ധതികൾ നടപ്പാക്കിയെന്ന് കായിക വകുപ്പ് മന്ത്രി വി. അബ്ദുറഹ്മാൻ പറഞ്ഞു. അഴീക്കോട് ഗ്രാമപഞ്ചായത്തിൽ ‘ഒരു പഞ്ചായത്തിൽ ഒരു കളിക്കളം’ പദ്ധതിയുടെ ഭാഗമായി നവീകരിച്ച പി.വി. രവീന്ദ്രൻ സ്മാരക ഫ്ലഡ്ലൈറ്റ് മിനി സ്റ്റേഡിയം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
കായിക മേഖലയിൽ രാജ്യത്ത് ഏറ്റവും കൂടുതൽ തുക ചെലവഴിക്കുന്ന സംസ്ഥാനം കേരളമാണെന്നും മന്ത്രി കൂട്ടിച്ചേർത്തു. പത്ത് വർഷം മുൻപ് രണ്ട് സിന്തറ്റിക് ട്രാക്കുകൾ മാത്രമുണ്ടായിരുന്ന സ്ഥാനത്ത് ഇപ്പോൾ അത് 25 ആയി വർദ്ധിപ്പിച്ചു. കണ്ണൂർ ജില്ലയിൽ മാത്രം 100 കോടി രൂപയുടെ 60 പദ്ധതികൾ നടന്നുവരികയാണെന്നും വടക്കേ മലബാറിലെ ഏറ്റവും വലിയ സ്റ്റേഡിയം തളിപ്പറമ്പിൽ ആരംഭിക്കുമെന്നും മന്ത്രി വ്യക്തമാക്കി.
അഴീക്കോട്ടെ സ്റ്റേഡിയം: കായിക താരങ്ങൾക്ക് മുതൽക്കൂട്ട്
കെ.വി. സുമേഷ് എം.എൽ.എയുടെ ആസ്തി വികസന ഫണ്ടിൽ നിന്ന് 50 ലക്ഷവും കായിക വകുപ്പ് അനുവദിച്ച 50 ലക്ഷവും ഉൾപ്പെടെ ഒരു കോടി രൂപ ചെലവഴിച്ചാണ് സ്റ്റേഡിയം നവീകരിച്ചത്. സംസ്ഥാനത്തെ ആദ്യത്തെ മൾട്ടിപർപ്പസ് ഫ്ലഡ്ലൈറ്റ് മഡ് ഗ്രൗണ്ടാണ് ഇതെന്ന് ചടങ്ങിൽ അധ്യക്ഷത വഹിച്ച കെ.വി. സുമേഷ് എം.എൽ.എ പറഞ്ഞു. സ്റ്റേഡിയത്തോട് ചേർന്ന് ഉടൻ തന്നെ ഓപ്പൺ ജിം നിർമ്മിക്കുമെന്നും അദ്ദേഹം അറിയിച്ചു.
ചടങ്ങിൽ പങ്കെടുത്തവർ:
മുൻ എം.എൽ.എ എം. പ്രകാശൻ മാസ്റ്റർ, ഇന്ത്യൻ ഫുട്ബോൾ മുൻ ക്യാപ്റ്റൻ കെ.വി. ധനേഷ് എന്നിവർ മുഖ്യതിഥികളായി. കണ്ണൂർ ബ്ലോക്ക് പഞ്ചായത്ത് പ്രസിഡന്റ് പി. പ്രശാന്തൻ, അഴീക്കോട് ഗ്രാമപഞ്ചായത്ത് പ്രസിഡന്റ് കെ. സനില, ബ്ലോക്ക് പഞ്ചായത്ത് വൈസ് പ്രസിഡന്റ് എ. റീന, ജില്ലാ പഞ്ചായത്ത് അംഗം കെ.വി. ഷക്കീൽ, സ്പോർട്സ് കൗൺസിൽ പ്രസിഡന്റ് പി.എം. അഖിൽ തുടങ്ങി നിരവധി ജനപ്രതിനിധികളും കായിക പ്രമുഖരും ചടങ്ങിൽ സംസാരിച്ചു.
About The Author
