പയ്യന്നൂർ ഫണ്ട് തട്ടിപ്പ് വിവാദം: വി. കുഞ്ഞികൃഷ്ണനെ സി.പി.ഐ (എം) പുറത്താക്കി; 'പാർട്ടിയെ വഞ്ചിച്ചുവെന്ന്' കെ.കെ. രാഗേഷ് -

Spread the love

കണ്ണൂർ: രക്തസാക്ഷി ഫണ്ട് തട്ടിപ്പ് വിവരം വെളിപ്പെടുത്തിയ പയ്യന്നൂരിലെ പ്രമുഖ നേതാവും സി.പി.ഐ (എം) ജില്ലാ കമ്മിറ്റി അംഗവുമായ വി. കുഞ്ഞികൃഷ്ണനെ പാർട്ടിയിൽ നിന്ന് പുറത്താക്കി. പാർട്ടിയെ വഞ്ചിച്ചുവെന്നും ശത്രുക്കളുടെ കോടാലിക്കൈയായി മാറിയെന്നും ആരോപിച്ചാണ് പ്രാഥമിക അംഗത്വത്തിൽ നിന്നുള്ള പുറത്താക്കൽ. സി.പി.ഐ (എം) കണ്ണൂർ ജില്ലാ സെക്രട്ടറി കെ.കെ. രാഗേഷ് വാർത്താ സമ്മേളനത്തിലാണ് ഇക്കാര്യം അറിയിച്ചത്.

ജില്ലാ സെക്രട്ടറിയുടെ പ്രധാന ആരോപണങ്ങൾ:

• കോടാലിക്കൈ: തിരഞ്ഞെടുപ്പ് മുന്നിൽക്കണ്ട് അഭിമുഖം നൽകിയതോടെ കുഞ്ഞികൃഷ്ണൻ പാർട്ടി ശത്രുക്കളുടെ ഉപകരണമായി മാറി. അദ്ദേഹം ഉത്തമനായ കമ്മ്യൂണിസ്റ്റല്ല, പാർട്ടിയെ പിന്നിൽ നിന്ന് കുത്തിയ ആളാണെന്നും രാഗേഷ് ആരോപിച്ചു.

• മധുസൂദനനെ താറടിക്കാനുള്ള ശ്രമം: എം.എൽ.എ ടി.ഐ. മധുസൂദനനെ വ്യക്തിപരമായി അധിക്ഷേപിക്കാനാണ് കുഞ്ഞികൃഷ്ണൻ ശ്രമിച്ചത്. ഭൂമി ഇടപാടിൽ അടക്കം ഉന്നയിച്ച ആരോപണങ്ങൾ അടിസ്ഥാനമില്ലാത്തവയാണ്. മധുവിനോടുള്ള പകയാണ് ഇതിന് പിന്നിലെന്നും അന്വേഷണ കമ്മീഷൻ റിപ്പോർട്ട് കുഞ്ഞികൃഷ്ണൻ നേരത്തെ അംഗീകരിച്ചതാണെന്നും സെക്രട്ടറി വ്യക്തമാക്കി.

ധനരാജ് ഫണ്ടിനെക്കുറിച്ച്:

ധനരാജിന്റെ കുടുംബത്തെ സഹായിക്കാനും വീട് വെച്ചു നൽകാനുമാണ് ഫണ്ട് ശേഖരിച്ചത്. ഇതിൽ പാർട്ടിക്ക് പണം നഷ്ടപ്പെട്ടിട്ടില്ല. എന്നാൽ വരവ് ചെലവ് കണക്ക് അവതരിപ്പിക്കുന്നതിൽ നാല് വർഷത്തെ താമസം ഉണ്ടായി. ഇതിന്റെ പേരിൽ മധുസൂദനൻ ഉൾപ്പെടെയുള്ളവർക്കെതിരെ 2022-ൽ തന്നെ നടപടി എടുത്തതാണെന്നും കെ.കെ. രാഗേഷ് വിശദീകരിച്ചു.