സ്വാതന്ത്ര്യ സമര സേനാനി ടി.സി.വി. കുഞ്ഞിരാമ പൊതുവാളുടെ ശില്പം ഒരുങ്ങി; ചിദംബരം അനാച്ഛാദനം ചെയ്യും
പയ്യന്നൂർ: പ്രമുഖ സ്വാതന്ത്ര്യ സമര സേനാനിയും ഖാദി പ്രചാരകനുമായിരുന്ന ടി.സി.വി. കുഞ്ഞിരാമ പൊതുവാളുടെ അർദ്ധ ശില്പം അനാച്ഛാദനത്തിന് തയ്യാറായി. പയ്യന്നൂർ അന്നൂർ കാർത്യായനി പുരത്ത് ജനുവരി 29 വ്യാഴാഴ്ച വൈകുന്നേരം 4.30-ന് നടക്കുന്ന ചടങ്ങിൽ ‘മഞ്ഞുമ്മൽ ബോയ്സ്’ ഫെയിം പ്രശസ്ത സിനിമാ സംവിധായകൻ ചിദംബരം ശില്പം അനാച്ഛാദനം ചെയ്യും.
വിദ്യാർത്ഥിയായിരിക്കെ സൈമൺ കമ്മീഷൻ ബഹിഷ്കരണ പ്രക്ഷോഭത്തിൽ പങ്കെടുത്ത് പോലീസ് പീഡനം ഏറ്റുവാങ്ങിയ ചരിത്രമാണ് ടി.സി.വി.യുടേത്. പന്തിഭോജനത്തിൽ പങ്കെടുത്തതിന് സമുദായത്തിൽ നിന്ന് പുറത്താക്കപ്പെട്ട അദ്ദേഹം, ക്വിറ്റ് ഇന്ത്യാ സമരത്തിൽ പങ്കെടുത്ത് ആലിപ്പൂർ സെൻട്രൽ ജയിലിൽ തടവ് അനുഭവിച്ചിട്ടുണ്ട്. സഹകാരി, ജീവകാരുണ്യ പ്രവർത്തകൻ, മികച്ച സംഘാടകൻ എന്നീ നിലകളിലെല്ലാം അദ്ദേഹം ശ്രദ്ധേയനായിരുന്നു.
ശില്പകലയിൽ വിസ്മയമൊരുക്കി ചിത്രൻ കുഞ്ഞിമംഗലം:
രാജ്യാന്തര തലത്തിൽ ശ്രദ്ധേയനായ ശില്പി ചിത്രൻ കുഞ്ഞിമംഗലം ആണ് ടി.സി.വി.യുടെ ശില്പം നിർമ്മിച്ചിരിക്കുന്നത്. വെങ്കല നിറത്തിൽ ഫൈബർ ഗ്ലാസിൽ നിർമ്മിച്ച ശില്പത്തിന് മൂന്നടി ഉയരമുണ്ട്. ടി.സി.വി.യുടെ പഴയകാല ബ്ലാക്ക് ആൻഡ് വൈറ്റ് ഫോട്ടോ ആധാരമാക്കിയാണ് ഒന്നര മാസത്തോളം സമയമെടുത്ത് ശില്പം പൂർത്തിയാക്കിയത്. കുടുംബാംഗങ്ങളുടെ നിർദ്ദേശങ്ങളും നിർമ്മാണത്തിൽ വലിയ പങ്കുവഹിച്ചു. ചിത്ര കെ., സുദർശൻ, അർജുൻ എന്നിവർ സഹായികളായി. ടി.സി.വി.യുടെ ജന്മശതാബ്ദി ദിനത്തിലാണ് ശില്പം നാടിന് സമർപ്പിക്കുന്നത്.
About The Author
