‘വിളിപ്പുറത്ത് പരാതി പരിഹാരം’; കണ്ണൂർ കോർപ്പറേഷന്റെ പുതിയ പദ്ധതിക്ക് നാളെ തുടക്കം, ഉദ്യോഗസ്ഥർക്ക് ഇലക്ട്രിക് സ്കൂട്ടറുകൾ നൽകും
കണ്ണൂർ: നഗരവാസികളുടെ പരാതികളിൽ അതിവേഗം ഇടപെടാനും പരിഹാരം കാണാനും ലക്ഷ്യമിട്ട് കണ്ണൂർ കോർപ്പറേഷൻ നടപ്പിലാക്കുന്ന ‘വിളിപ്പുറത്ത് പരാതി പരിഹാരം’ പദ്ധതിക്ക് നാളെ (വ്യാഴാഴ്ച) തുടക്കമാകും. ഇതിന്റെ ഭാഗമായി ഫീൽഡ് തലത്തിൽ പ്രവർത്തിക്കുന്ന ഉദ്യോഗസ്ഥർക്കുള്ള ഇലക്ട്രിക് സ്കൂട്ടറുകളുടെ വിതരണോദ്ഘാടനം കണ്ണൂർ കോർപ്പറേഷൻ മേയർ അഡ്വ. പി. ഇന്ദിര നിർവഹിക്കും.
വേഗത്തിൽ ജനങ്ങളിലേക്ക്:
നാളെ (മാർച്ച് 12) ഉച്ചയ്ക്ക് 1 മണിക്ക് കോർപ്പറേഷൻ ഓഫീസിൽ വെച്ചാണ് വിതരണോദ്ഘാടന ചടങ്ങ് നടക്കുക. ഡെപ്യൂട്ടി മേയർ കെ.പി. താഹിർ ചടങ്ങിൽ സ്വാഗതം ആശംസിക്കും. ജനങ്ങളുടെ പരാതികളിൽ കാലതാമസമില്ലാതെ നേരിട്ടെത്തി നടപടിയെടുക്കാൻ ഈ പുതിയ സംവിധാനം ഉദ്യോഗസ്ഥരെ വലിയ രീതിയിൽ സഹായിക്കുമെന്നാണ് വിലയിരുത്തൽ.
പരാതി പരിഹാര സംവിധാനം കാര്യക്ഷമമാക്കുന്നതിനൊപ്പം പരിസ്ഥിതി സൗഹൃദമായ ഇലക്ട്രിക് വാഹനങ്ങൾ ഉദ്യോഗസ്ഥർക്ക് നൽകുന്നതിലൂടെ മികച്ച മാതൃകയാണ് കോർപ്പറേഷൻ ഭരണസമിതി കാട്ടുന്നത്.
About The Author
