ബഹിരാകാശ ഗവേഷണ രംഗം അനന്തസാധ്യതകളുടെ ലോകം: പി കുഞ്ഞികൃഷ്ണൻ.
പയ്യന്നൂർ: ബഹിരാകാശ ഗവേഷണ രംഗം ഇന്ന് വൻ മുതൽമുടക്കുള്ള സംരംഭങ്ങൾ ആണെന്നും കുട്ടികൾക്ക് അനന്തമായ ഗവേഷണ സാധ്യതകൾ തുറന്നു തരുന്ന ലോകമാണെന്നും സതീഷ് ധവാൻ സ്പേസ് സെന്റർ മുൻ ഡയറക്ടർ പി. കുഞ്ഞികൃഷ്ണൻ അഭിപ്രായപ്പെട്ടു.
പയ്യന്നൂർ കോളേജ് വജ്ര ജൂബിലി ആഘോഷങ്ങളുടെ ഭാഗമായി നടക്കുന്ന ഔട്ട് റീച്ച് പ്രോഗ്രാം കണ്ടങ്കാളി ഷേണായി സ്മാരക ഗവൺമെന്റ് ഹയർ സെക്കൻഡറി സ്കൂളിൽ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
പുതിയ ലോകത്തെ സാധ്യതകൾ ഉപയോഗപ്പെടുത്താൻ കുട്ടികൾ ഡിജിറ്റൽ സ്കില്ലും സോഫ്റ്റ് സ്കില്ലും സ്വായത്തമാക്കേണ്ടതുണ്ടെന്നും നൂതനമായ ആശയങ്ങളുമായി വരുന്ന വിദ്യാർത്ഥികൾക്ക് വ്യത്യസ്ത മേഖലകളിലുള്ള ഗവേഷണ രംഗത്ത് അനന്തമായ സാധ്യതകൾ ഉണ്ടെന്നും അദ്ദേഹം പറഞ്ഞു.
സ്കൂൾ പ്രിൻസിപ്പൽ ഇൻ ചാർജ് ശ്രീജ. ബി. എൻ. അധ്യക്ഷയായി.
പയ്യന്നൂർ കോളേജ് പ്രിൻസിപ്പൽ പ്രൊഫ. ഡോ. വി എം സന്തോഷ് സ്വാഗതവും ഔട്ട് റീച്ച് പ്രോഗ്രാം ചെയർമാൻവി ഉപേന്ദ്ര ഷേണായ് നന്ദിയും പറഞ്ഞു. പയ്യന്നൂർ എഡ്യൂക്കേഷണൽ സൊസൈറ്റി പ്രസിഡന്റ് കെ. കെ. സുരേഷ്കുമാർ, പ്രദീപ് പി. പി, അഡ്വ. ശശി വട്ടക്കൊവ്വൽ, ഡോ. സുധീഷ് കെ എം, ഡോ. പ്രശാന്ത് പി.എന്നിവർ സംസാരിച്ചു. കോളേജിന്റെ വജ്ര ജൂബിലി ആഘോഷങ്ങളുടെ ഭാഗമായി സമീപപ്രദേശത്തെ വിദ്യാലയങ്ങളിലും വായനശാലകളിലും ഇത്തരത്തിലുള്ള നിരവധി പ്രോഗ്രാമുകൾ നടത്തുന്നതിന് ആസൂത്രണം ചെയ്തിട്ടുണ്ടെന്ന് കോളേജ് അധികൃതർ അറിയിച്ചു.
About The Author
