അഡ്വ. പി ഇന്ദിരയെ മേയർ സ്ഥാനാർത്ഥിയായി പ്രഖ്യാപിച്ച് കെ സുധാകരൻ എംപി
കണ്ണൂർ: കണ്ണൂർ കോർപറേഷന്റെ പുതിയ മേയറായി അഡ്വ. പി. ഇന്ദിരയെ തെരഞ്ഞെടുത്തു. കോൺഗ്രസ് കോർ കമ്മിറ്റി യോഗത്തിലാണ് ഇതുസംബന്ധിച്ച തീരുമാനം എടുത്തത്. തീരുമാനമുണ്ടായത് ഏകകണ്ഠമായാണെന്ന് കെ.പി.സി.സി പ്രസിഡന്റ് കെ. സുധാകരൻ വ്യക്തമാക്കി.
പയ്യാമ്പലം വാർഡിൽ നിന്ന് 48 വോട്ടിന്റെ ഭൂരിപക്ഷത്തിന് ജയിച്ച പി. ഇന്ദിര, കെ.സി. വേണുഗോപാൽ ഉൾപ്പെടെ നാല് പേർ മത്സരിച്ച ശക്തമായ പോരാട്ടത്തിലാണ് വിജയിച്ചത്. തെരഞ്ഞെടുപ്പിൽ വിജയിച്ചതോടെ തന്നെ മേയർ സ്ഥാനത്തേക്ക് ഇന്ദിരയുടെ പേര് ഏറെക്കുറെ ഉറപ്പായിരുന്നു.
മേയർ പദവി പാർട്ടി നൽകിയ ഏറ്റവും വലിയ അംഗീകാരമാണെന്ന് നിയുക്ത മേയർ പി. ഇന്ദിര പ്രതികരിച്ചു. യുഡിഎഫ് ഒറ്റക്കെട്ടായി കണ്ണൂരിന്റെ മുഖഛായ മാറ്റാൻ പ്രവർത്തിക്കുമെന്ന് അവർ പറഞ്ഞു.
കെഎസ്യുവിൽ പ്രവർത്തിച്ച കാലത്ത് കൃഷ്ണമേനോൻ സ്മാരക വനിതാ കോളജിൽ അട്ടിമറി വിജയത്തിലൂടെ ചെയർപേഴ്സണായിരുന്ന പി. ഇന്ദിര, കണ്ണൂർ മുനിസിപ്പാലിറ്റിയിലും പിന്നീട് കോർപറേഷനിലും കൗൺസിലറായി പ്രവർത്തിച്ചിട്ടുണ്ട്. ഡെപ്യൂട്ടി മേയർ, ആരോഗ്യ സ്റ്റാൻഡിങ് കമ്മിറ്റി ചെയർപേഴ്സൺ, പൊതുമരാമത്ത് സ്റ്റാൻഡിങ് കമ്മിറ്റി അധ്യക്ഷ എന്നീ നിലകളിലും സേവനമനുഷ്ഠിച്ചിട്ടുണ്ട്.
2015ൽ കണ്ണൂർ മുനിസിപ്പാലിറ്റി കോർപറേഷനായതിനു ശേഷം തുടർച്ചയായി മൂന്നാം തവണയാണ് പി. ഇന്ദിര കൗൺസിലറായി തെരഞ്ഞെടുക്കപ്പെടുന്നത്. 56 സീറ്റുകളിൽ 36 സീറ്റുകൾ നേടി യുഡിഎഫ് ഇത്തവണയും കണ്ണൂർ കോർപറേഷൻ ഭരണം നിലനിർത്തി.
ഡെപ്യൂട്ടി മേയർ സ്ഥാനത്തേക്ക് മുസ്ലിം ലീഗിലെ കെ.പി. താഹിറിനെ പരിഗണിക്കുന്നതായാണ് സൂചന.
About The Author
