സംസ്ഥാന ബഡ്സ് ഒളിമ്പ്യയ്ക്ക് കണ്ണൂരിൽ തുടക്കമാവുന്നു; 380 കായിക താരങ്ങൾ മാറ്റുരയ്ക്കും
കണ്ണൂർ: ബുദ്ധിപരമായ വെല്ലുവിളികൾ നേരിടുന്ന കുട്ടികളുടെ സംസ്ഥാനതല കായിക മാമാങ്കമായ ‘ബഡ്സ് ഒളിമ്പ്യ 2026’ (ബഡ്സ് ഒളിമ്പ്യ 2.0) ജനുവരി 23, 24 തീയതികളിൽ കണ്ണൂർ പോലീസ് പരേഡ് സിന്തറ്റിക് ഗ്രൗണ്ടിൽ നടക്കും. കുടുംബശ്രീ സംസ്ഥാന മിഷന്റെ നേതൃത്വത്തിൽ സംഘടിപ്പിക്കുന്ന ഈ ഒളിമ്പ്യാഡിൽ 14 ജില്ലകളിൽ നിന്നായി 380 കായിക താരങ്ങളാണ് പങ്കെടുക്കുന്നത്.
കായിക പ്രതിഭകളെ വളർത്താൻ ലക്ഷ്യം:
കുട്ടികളുടെ കായിക ക്ഷമത വർധിപ്പിക്കുന്നതിനും ദേശീയ തലത്തിൽ ഇവർക്ക് അവസരങ്ങൾ ഒരുക്കുന്നതിനുമായാണ് ഒളിമ്പിക്സ് മാതൃകയിൽ ഈ കായികോത്സവം സംഘടിപ്പിക്കുന്നത്. ബഡ്സ് ഒളിമ്പ്യയുടെ രണ്ടാമത് പതിപ്പാണ് കണ്ണൂരിൽ അരങ്ങേറുന്നത്. കഴിഞ്ഞ വർഷം മലപ്പുറത്തായിരുന്നു പ്രഥമ മേള നടന്നത്. പൂർണ്ണമായും ഗ്രീൻ പ്രോട്ടോകോൾ പാലിച്ചാണ് മത്സരങ്ങൾ സംഘടിപ്പിക്കുന്നത്.
ഉദ്ഘാടനം – ജനുവരി 23 (വെള്ളി):
വെള്ളിയാഴ്ച ഉച്ചയ്ക്ക് 2:30-ന് രാജ്യസഭ എം.പി ഡോ. വി. ശിവദാസൻ കായിക മേള ഉദ്ഘാടനം ചെയ്യും. കണ്ണൂർ ജില്ലാ പഞ്ചായത്ത് പ്രസിഡന്റ് ബിനോയ് കുര്യൻ അധ്യക്ഷത വഹിക്കും. ജില്ലാ കളക്ടർ അരുൺ കെ. വിജയൻ മുഖ്യാതിഥിയാകും. കുടുംബശ്രീ മിഷൻ എക്സിക്യൂട്ടീവ് ഡയറക്ടർ എച്ച്. ദിനേശൻ, പ്രോഗ്രാം ഓഫീസർ ബി. ശ്രീജിത്ത് എന്നിവർ സംസാരിക്കും. ജില്ലാ പോലീസ് കമ്മീഷണർ നിധിൻ രാജ് ദീപശിഖ ഏറ്റുവാങ്ങും.
സമാപനം – ജനുവരി 24 (ശനി):
ശനിയാഴ്ച ഉച്ചയ്ക്ക് 3 മണിക്ക് നടക്കുന്ന സമാപന സമ്മേളനം തദ്ദേശ സ്വയംഭരണ വകുപ്പ് മന്ത്രി എം.ബി. രാജേഷ് ഉദ്ഘാടനം ചെയ്യും. മന്ത്രി രാമചന്ദ്രൻ കടന്നപ്പള്ളി അധ്യക്ഷത വഹിക്കും. മേയർ പി. ഇന്ദിര, കെ. സുധാകരൻ എം.പി, സന്തോഷ് കുമാർ എം.പി എന്നിവർ മുഖ്യാതിഥികളാകും.
എം.വി. ഗോവിന്ദൻ മാസ്റ്റർ, കെ.കെ. ശൈലജ ടീച്ചർ, കെ.വി. സുമേഷ്, ടി.ഐ. മധുസൂദനൻ, സജീവ് ജോസഫ്, എം. വിജിൻ തുടങ്ങിയ എം.എൽ.എമാരും സമ്മാനദാന ചടങ്ങിൽ പങ്കെടുക്കും. ശനിയാഴ്ച വൈകുന്നേരം 7 മണിയോടെ കായികമേള സമാപിക്കും.
About The Author
