ബഡ്സ് ഒളിമ്പിയ 2.0; കായിക കിരീടം പത്തനംതിട്ടയ്ക്ക്, കണ്ണൂർ മൂന്നാം സ്ഥാനത്ത്
കണ്ണൂർ: ബൗദ്ധിക വെല്ലുവിളി നേരിടുന്ന കുട്ടികൾക്കായി സംഘടിപ്പിച്ച സംസ്ഥാനതല കായിക മേള ‘ബഡ്സ് ഒളിമ്പിയ 2.0’-ൽ പത്തനംതിട്ട ജില്ല ജേതാക്കളായി. 71 പോയിന്റുകൾ നേടിയാണ് പത്തനംതിട്ട ഒന്നാമതെത്തിയത്. 52 പോയിന്റുകൾ നേടിയ കൊല്ലം ജില്ല രണ്ടാം സ്ഥാനവും, 48 പോയിന്റുകൾ നേടിയ ആതിഥേയരായ കണ്ണൂർ ജില്ല മൂന്നാം സ്ഥാനവും കരസ്ഥമാക്കി.
കണ്ണൂർ പോലീസ് പരേഡ് ഗ്രൗണ്ടിൽ നടന്ന ആവേശകരമായ പോരാട്ടങ്ങളിൽ ശാരീരിക പരിമിതികളെ മറികടന്ന് 380-ഓളം കുട്ടികളാണ് പങ്കെടുത്തത്. 100 മീറ്റർ ഓട്ടം, ബോൾ ത്രോ, വീൽചെയർ റേസ്, ബാസ്കറ്റ് ബോൾ ത്രോ തുടങ്ങിയ ഇനങ്ങളിലായിരുന്നു മത്സരങ്ങൾ.
ആവേശകരമായ സമാപനം:
സമാപന സമ്മേളനം കണ്ണൂർ കോർപറേഷൻ മേയർ അഡ്വ. പി. ഇന്ദിര ഉദ്ഘാടനം ചെയ്തു. കെ.വി. സുമേഷ് എം.എൽ.എ അധ്യക്ഷനായി. ജില്ലാ പഞ്ചായത്ത് പ്രസിഡന്റ് അഡ്വ. ബിനോയ് കുര്യൻ, ജില്ലാ കളക്ടർ അരുൺ കെ. വിജയൻ, കുടുംബശ്രീ എക്സിക്യൂട്ടിവ് ഡയറക്ടർ എച്ച്. ദിനേശൻ തുടങ്ങിയവർ സംബന്ധിച്ചു. മത്സരത്തിൽ പങ്കെടുത്ത എല്ലാ കുട്ടികൾക്കും സമ്മാനങ്ങൾ നൽകിയാണ് സംഘാടകർ യാത്രയാക്കിയത്.
തികച്ചും ഹരിതചട്ടം പാലിച്ച് നടത്തിയ മേളയിൽ കുടുംബശ്രീയുടെ നേതൃത്വത്തിൽ വിപുലമായ ഭക്ഷണ-താമസ സൗകര്യങ്ങളും മെഡിക്കൽ സഹായങ്ങളും ഒരുക്കിയിരുന്നു. വമ്പിച്ച സംഘാടന മികവോടെയാണ് കണ്ണൂർ ഈ കായിക മേളയ്ക്ക് ആതിഥ്യമരുളിയത്.
About The Author
